Gürcüstanın Dmanisi rayonunun Qızılkilsə kəndində tanınmış şair, Aşıq Pəri Məclisinin yaradıcılarından biri Səadət Butanın ev-muzeyinin açılışı olub.

Mərasimdə paytaxt Tbilisidən, Marneuli, Qardabani, Bolnisi və digər rayonlardan, eləcə də Azərbaycan, Türkiyə və Qazaxıstandan gəlmiş qonaqlar, dövlət rəsmiləri, mədəniyyət xadimləri iştirak ediblər.

Dmanisi rayonunun meri Koba Muradaşvili açılış rəmzi olan qırmızı lenti kəsib və bildirib ki, bu muzey təkcə Səadət Butanın kitablarının, əşyalarının, layiq görüldüyü mükafatların, qiymətli hədiyyələrin saxlanılacağı yer olmayacaq, həm də ədəbiyyat, incəsənət və mədəniyyət ocağı kimi fəaliyyət göstərəcək.

Sonra tədbir iştirakçıları fotoşəkillər, şairin bu günədək aldığı mükafatlar, müəllifi olduğu kitablar və digər eksponatlarla tanış olublar. Çıxış edənlər Səadət Butanın yaradıcılığından, onun Azərbaycan və Gürcüstan dövlətləri arasındakı mədəni əlaqələrin inkişafına verdiyi töhfələrdən danışıblar.

Qeyd edək ki, Səadət Buta 1951-ci ildə Dmanisi bələdiyyəsinin Qızılkilsə kəndində anadan olub. O, Gürcüstan Prezidenti tərəfindən “Şərəf” medalı ilə təltif edilib.