Avqustun 30-da İsveçin paytaxtı Stokholmda Azərbaycanın Qarabağ müharibəsində Zəfərinin beşinci ildönümünə həsr olunmuş “Zəfərin xronikası: Qalib xalqın Müzəffər lideri” mövzusunda beynəlxalq videokonfrans keçirilib.
70-ə yaxın qonağın iştirak etdiyi tədbirdə Dünya Azərbaycanlıları Beynəlxalq Fondunun həmtəsisçisi Emil Mirzəyev, bu fondun baş katibi professor Hikmət Cavadov, Azərbaycan Respublikasının İsveç Krallığında səfirliyinin əməkdaşı Orxan Nemətov, Şamaxı rayon Heydər Əliyev Mərkəzinin direktoru Könül Eyvazova və başqaları çıxış ediblər. Onlar bildiriblər ki, Qarabağda qazanılan Qələbə xalqın birlik və iradəsi, Azərbaycanın rəşadətli Ordusunun şücaəti sayəsində mümkün olub. Qələbənin qazanılmasında xüsusi rol özünü islahatçı-lider kimi təsdiq etmiş, 1990-cı illərin əvvəlində əldə olunmuş müstəqilliyi qoruyub saxlamaqla yanaşı, həm də XXI əsrdə ölkənin inkişaf yolunu yenidən müəyyənləşdirmiş Prezident İlham Əliyevə məxsusdur.
