Aprelin 5-də Milli Məclisin sədri Sahibə Qafarova Özbəkistanda Parlamentlərarası İttifaqın (PAİ) 150-ci Assambleyası çərçivəsində keçirilən Asiya Parlament Assambleyasının (APA) Koordinasiya iclasında çıxış edib.
Milli Məclisin sədri bildirib ki, bu, APA-nın PAİ çərçivəsində Azərbaycanın sədrliyi ilə keçirilən üçüncü əlaqələndirmə iclasıdır.
2025-ci il fevralın 18-20-də Bakı şəhərində "Asiyada çoxtərəfli əməkdaşlığın gücləndirilməsində parlament diplomatiyasının rolu" mövzusuna həsr edilmiş APA-nın 15-ci Plenar iclasının keçirildiyini xatırladan Sahibə Qafarova, 27 dövlətin və 7 beynəlxalq təşkilatın nümayəndələrinin iştirak etdiyi tədbirin təşkilat daxilində əməkdaşlığın inkişafı, regional və beynəlxalq proseslərlə bağlı birgə marağımız olan müxtəlif məsələlər barədə fikir mübadiləsi aparmaq üçün dəyərli fürsət verdiyini bildirib.
Milli Məclisin sədri çıxışında Azərbaycanın öz sədrliyi dövründə irəli sürdüyü prioritetlər barədə də danışıb. Onun sözlərinə görə, bu prioritetlər APA-nın institusional imkanlarının inkişafı, sıralarımızın genişləndirilməsi və mövcud orqanların effektivliyinin artırılması ilə bağlıdır. Spiker bu baxımdan 15-ci iclasın yekunlarının olduqca ümidverici olduğunu deyib.
Sahibə Qafarovanın sözlərinə görə, APA Bürosunun fəallaşması və Daimi Komitələrin hər bir yığıncağında onun iclaslarının çağırılması təşkilatın ehtiyaclarına sürətli cavab verməyə kömək edir. Komitələrimizin işləri nəticəsində siyasi, iqtisadi, mədəni, sosial, ətraf mühit və digər məsələləri əhatə edən 29 qətnamə qəbul edilib. Bakı Bəyannaməsi müzakirə olunan məsələlərə dair iştirakçıların ümumi mövqeyini əks etdirir.
***
Milli Məclisin sədri Sahibə Qafarova Özbəkistan Respublikasına işgüzar səfəri çərçivəsində Daşkənd şəhərində Pakistan İslam Respublikası Senatının sədri Seyid Yusuf Rza Gilani ilə görüşüb.
Görüşdə vurğulanıb ki, Azərbaycan və Pakistan arasında strateji münasibətlər dostluq və qardaşlıq prinsipləri əsasında qurulub. Dövlət başçılarının qarşılıqlı səfərləri münasibətlərin daha da genişlənməsinə stimul verib. İki ölkənin qanunverici orqanları ölkələrimiz arasında əlaqələrin daha da inkişafına verdiyi mühüm töhfələr də qeyd edilib.
Görüşdə beynəlxalq parlament təşkilatlarında əməkdaşlıq və qarşılıqlı dəstəkdən məmnunluq ifadə olunub. Spiker Sahibə Qafarova qarşı tərəfə Prezident İlham Əliyevin təşəbbüsü ilə yaradılan Qoşulmama Hərəkatı Parlament Şəbəkəsinin fəaliyyəti, təşkilatın institusional inkişafı istiqamətində atılan addımlar barədə məlumat verib.
Seyid Yusuf Rza Gilani ölkəsinin Azərbaycanla münasibətlərə çox böyük önəm verdiyini qeyd edərək deyib ki, Pakistan və Azərbaycan həmişə bir-birini dəstəkləyən qardaş ölkələrdir. Senat sədri xalqlar arasında da təmasların vacibliyini ifadə edib. Bu baxımdan parlamentlər arasında əməkdaşlığın daha da genişləndirilməsinin önəmi qeyd edilib.
***
Milli Məclisin sədri Sahibə Qafarova həmin gün Asiya Siyasi Partiyalarının Beynəlxalq Konfransının (İCAPP) Daimi Komitəsinin sədri Çunq Eui-yong ilə görüşüb.
Görüşdə İCAPP-ın Asiya regionunda sülh, təhlükəsizlik və əməkdaşlığı təşviq edən mühüm bir platforma kimi çıxış etdiyi qeyd olunaraq, bu kimi görüşlərin çoxtərəfli əməkdaşlıq məsələlərini müzakirə etmək üçün fürsət olduğu bildirilib, həmçinin beynəlxalq təşkilatlarda əməkdaşlığın vacibliyi diqqətə çatdırılıb.
Söhbət zamanı Parlament Şəbəkəsi ilə İCAAP arasında əməkdaşlıq əlaqələri məmnunluqla qeyd edilərək bildirilib ki, tərəflər arasında Anlaşma Memorandumu imzalanıb. Hazırda İCAAP Qoşulmama Hərəkatı Parlament Şəbəkəsində müşahidəçi statusunda təmsil olunur.
Çunq Eui-yong Azərbaycanın liderliyi ilə Parlament Şəbəkəsinin inkişaf etdiyini qeyd edib. O, ölkəmizə səfərlərini məmnunluqla xatırlayaraq, ölkəmiz və paytaxt Bakı haqqında xoş təəssüratlarını bölüşüb.
***
Dünən Milli Məclisin sədri Sahibə Qafarova Bəhreyn Krallığı Nümayəndələr Şurasının sədri Əhməd bin Salman Əl-Musalam ilə görüşüb.
Görüşdə ölkələrimiz arasında münasibətlərin mövcud vəziyyətindən məmnunluq ifadə edilib. Qanunverici orqanlarımız arasında əməkdaşlığın daha da dərinləşdirilməsi üçün yaxşı potensial olduğu qeyd edilərək bildirilib ki, parlamentlərimiz arasında qarşılıqlı fəaliyyət dövlətlərimiz arasında əlaqələrin inkişafına mühüm və müsbət təsir göstərir. Bu gün qanunverici orqanlarımız arasında səmərəli əməkdaşlıq qurulub.
XQ
