Özbəkistanın paytaxtı Daşkənd şəhərində işgüzar səfərdə olan Milli Məclisin Sədri Sahibə Qafarova aprelin 4-də Parlamentlərarası İttifaqın Baş katibi Martin Çunqonq ilə görüşüb.

Görüşdə Milli Məclislə Parlamentlərarası İttifaq arasında əməkdaşlıq məsələləri nəzərdən keçirilib. Bildirilib ki, Parlamentlərarası İttifaq beynəlxalq əməkdaşlıq baxımından səmərəli platformadır. Qeyd olunub ki, beynəlxalq parlament qurumları ilə ikitərəfli və çoxtərəfli əsasda əməkdaşlıq edən Milli Məclis Parlamentlərarası

İttifaqla əlaqələrin genişləndirilməsinə mühüm əhəmiyyət verir.

Söhbət zamanı Azərbaycanın təşkilatda yüksək səviyyədə və fəal şəkildə təmsil olunması müsbət qiymətləndirilib. Milli Məclisin deputatlarının təşkilatın rəhbər orqanlarında təmsil olunmasından məmnunluq ifadə edilib.

Söhbət zamanı regionda mövcud vəziyyət, Azərbaycan və Ermənistan arasında normallaşma prosesi barədə də fikir mübadiləsi aparılıb. Görüşdə, həmçinin Parlamentlərarası İttifaq ilə Qoşulmama Hərəkatının (QH) Parlament Şəbəkəsi arasında da əməkdaşlıq məsələləri müzakirə edilib.

Martin Çunqonq Parlament Şəbəkəsinin fəaliyyətini yüksək qiymətləndirib və iki təşkilat arasında əməkdaşlığın önəmini diqqətə çatdırıb.

XQ