Dəfələrlə Bakıda beynəlxalq tədbirlərdə, humanitar forumlarda iştirak etmişəm. Onu deyə bilərəm ki, Azərbaycan hər gəlişimdə daha fərqli, daha çox inkişaf etmiş formada qarşıma çıxıb. Seçki proseslərini bir neçə dəfə izləmişəm. Bundan əvvəlki seçkilərdə biz beynəlxalq müşahidəçilər qrupu ilə məntəqələrdə olmuş və doğrusu, heç bir nöqsan aşkar etməmişdik. Dövlətiniz də seçki üçün lazım olan hər şəraiti yaratmışdı. Güman ki, qarşıdakı seçkilərdə Bakıda olacağam...
Bu fikirləri XQ-yə Asiya Siyasi Partiyalarının Beynəlxalq Konfransının (ICAP) Prezident müşaviri, Qlobal İdarəçilik və İnkişaf Təşkilatının baş direktoru Gözdə Dizdar bildirib. O qeyd edib ki, Azərbaycanda sentyabrın 1-də keçiriləcək parlament seçkilərinə hazırlığı yaxından izləyir: “Əlbəttə, Milli Məclis Türkiyədə də, elə qardaş Azərbaycanda da dövlətin idarə olunmasında mühüm yer tutan orqandır. Ona görə də belə bir strateji və mühüm quruma seçkilər də öz ciddiliyi, kütləvi maraqlılığı ilə fərqlənməlidir. Çünki bu, önəmli siyasi prosesdir. Hesab edirəm ki, Azərbaycanda keçiriləcək seçkilər də kütləvilik baxımından maraqlı olacaq və əhalinin əhəmiyyətli hissəsini özünə cəlb edəcək. Görürəm ki, Azərbaycan dövləti seçkilərin demokratik şərt və prinsiplərə uyğun ədalətli keçirilməsi üçün əlindən gələni edir. Tək paytaxt Bakıda deyil, ucqar regionlarda da seçkilər üçün yaxşı şərait yaradılıb”– deyə Dizdar bildirib.
Təşkilat sədri qeyd edib ki, bu il həm də işğaldan azad edilən Qarabağ torpaqlarında da seçkilər keçiriləcək: “Səhv etmirəmsə, bu, müstəqilliyin bərpasından sonra ilk parlament seçkisidir. Bu, çox önəmli siyasi hadisədir. Hətta deyərdim tarixi hadisədir. Parlament seçkilərinin şəffaf və ədalətli keçirilməsi, seçici fəallığının artırılması üçün bütün imkanlar yaradılır. Son illər ölkənizdə keçirilən seçkilərin insidentsiz və seçkinin nəticəsinə təsir edəcək ciddi qanun pozuntusu olmadan başa çatması beynəlxalq aləmdə də etiraf olunur. Budəfəki seçkilərdə də bu ənənənin davam etdiriləcəyinə inanıram”.
G.Dizdar daha sonra əlavə edib ki, bu il Azərbaycan möhtəşəm, dünya səviyyəli bir tədbirə – COP29-a evsahibliyi edəcək. Bu gün bəşəriyyəti ciddi narahat edən iqlim və ekoloji problemlərin həlli yolları məhz Bakıda çözüləcək. 80 minə yaxın insan Bakıya gələcək. Bu çox böyük rəqəmdir. Ard-arda iki böyük siyasi prosesi təşkil etmək, uğurla başa çatdırmaq hər dövlətə müyəssər olan avantaj deyil. Bu, Azərbaycan dövlətinin yüksək təşkilatçılıq ənənələrinin olmasını sübut edir. Azərbaycanın qarşıdan gələn hər iki mötəbər siyasi prosesi uğurla başa çatdıracağına əminik.
Anar TURAN
XQ