Şuşada “İslam dünyasında qadınlar: Ənənələr və çağırışlar” mövzusunda ikigünlük konfrans keçirilir. İlk gündə iştirakçılar şəhərin tarixi məkanları və təbiət abidələri ilə tanış olublar.
Qonaqlar əvvəlcə “İsa bulağı” istirahət kompleksində bərpa işləri ilə tanış olublar. Onlara məlumat verilib ki, Vətən müharibəsindən sonra İsa bulağını Şuşa Şəhəri Dövlət Qoruğu İdarəsi işğalçıların qəsdlərindən təmizləyərək bərpa edib. Bulağın özü mərmərdən hazırlanıb, “İsa bulağı” sözləri klassik qrafika üslubunda yazılıb. Tarixi çeşmənin axarı təmizlənib zəifləmiş gözü açılıb. Bulağın ətrafındakı istirahət mərkəzi və restoran milli üslubda təmir edilib, ərazidə abadlıq işləri aparılıb.
Sonra konfrans iştirakçıları Qarabağ xanının vəziri, şair Molla Pənah Vaqifin muzey-məqbərə kompleksində olublar. Onlara bildirilib ki, 1 gün sonra burada keçiriləcək poeziya bayramına hazırlıq başa çatdırılıb. Şuşa qala divarları ilə tanışlıq zamanı ziyarətçilərə Şuşa şəhərinin tarixi, qala divarlarının tikilməsi barədə məlumat verilib. Qeyd edilib ki, Pənahəli xanın inşa etdirdiyi qala uzun müddət şəhəri xarici müdaxilələrdən qoruyub, qəhrəmanlıq rəmzi olub. İşğal dövründə qala divarları da erməni vandalizminə məruz qalıb. Şuşa işğaldan azad edildikdən sonra burada da təmir-bərpa işləri aparılıb.
Gəzinti zamanı işğal dövründə mədəniyyət abidələrimizə ermənilərin vurduqları saysız-hesabsız ziyan, qədim artefaktların saxtalaşdırılması barədə geniş bilgi verilib. Bildirilib ki, Şuşa işğaldan azad edildikdən sonra burada genişmiqyaslı bərpa-quruculuq işlərinə başlanılıb. İnfrastrukturun qurulması ilə yanaşı, şəhərin əsl simasının, tarixi və mədəniyyət abidələrinin bərpasına start verilib.
Daha sonra Cıdır düzünə gələn qonaqlar buradan açılan əsrarəngiz təbiət mənzərəsini seyr ediblər. Günün sonunda konfrans iştirakçıları üçün konsert proqramı təqdim olunub.
Zərifə HÜSEYNOVA
XQ
Şuşa
