Qazaxıstanın Məngistay vilayətində iyulun 8-dən 17-dək keçirilən “Birlestik-2024” (Birlik-2024) adlı hərbi təlimlər başa çatıb.
Qazaxıstan Müdafiə Nazirliyi mətbuat xidmətinin yaydığı məlumata görə, Azərbaycan, Qazaxıstan, Qırğızıstan, Özbəkistan və Tacikistan hərbçilərinin iştirak etdiyi hərbi təlimlər Xəzər dənizi sahilindəki “Oymaşa” poliqonunda keçirilib. Təlimlərə bu ölkələrdən 4 minə yaxın əsgər, o cümlədən 700-dək hərbi texnika cəlb olunub.
Hərbi təlimləri Azərbaycanın müdafiə naziri, general-polkovnik Zakir Həsənov, Qazaxıstan, Qırğızıstan, Özbəkistan və Tacikistanın müdafiə nazirləri, 15 xarici ölkənin Qazaxıstandakı hərbi attaşe aparatının rəhbərləri izləyiblər.
Səfər çərçivəsində Qazaxıstanın müdafiə naziri, general-polkovnik Ruslan Jaksılıkov Zakir Həsənovla görüşüb, ölkələr arasında hərbi sahədə əməkdaşlıq məsələləri müzakirə olunub.
Təlimlərin başa çatması münasibəti ilə keçirilən mərasimdə iştirakçı ölkələrin yüksək səviyyəli hərbçiləri təlimləri, iştirakçıların müasir hərbi texnikadan səmərəli istifadə bacarığını, həmçinin hərbi qulluqçuların professionallığını müsbət qiymətləndiriblər.
Nazirliyin məlumatında qeyd olunur ki, 5 ölkənin hərbçiləri “silahlı münaqişənin lokallaşdırılması” üçün şərti terrorçular tərəfindən tutulan adamın azad edilməsi, Xəzər dənizi akvatoriyasında qeyri-qanuni hərbi dəstələrin zəərərsizləşdirilməsi, dənizin təhlükəsizliyinin təmin olunması və infrastrukturun qorunması üzrə birgə əməliyyatlar həyata keçiriblər. “Münaqişənin lokallaşdırılması” əməliyyatında quru və hava kəşfiyyatı hərbçiləri, xüsusi dəniz təyinatlıları, artilleriya ekipajları, hücum və tank bölmələri, aviasiya və gəmilər iştirak ediblər. Ssenariyə əsasən, Azərbaycan Hərbi-hava qüvvələrinin paraşüt-desant və axtarış-xilasetmə qrupları vurulan hərbi helikopterin ekipajını döyüş sahəsindən təxliyə ediblər.
Bağlanış mərasimində təlimlərdə iştirak edən hərbçilər medallarla və qiymətli hədiyyələrlə mükafatlandırılıb.
Qulu KƏNGƏRLİ,
XQ-nin Mərkəzi Asiya müxbiri
Astana
