Aprelin 25-də Naxçıvan Muxtar Respublikası Ali Məclisinin yaz sessiyasının növbəti plenar iclasında Ceyhun Ramiz oğlu Cəlilovun Naxçıvan Muxtar Respublikasının Baş naziri təyin edilməsi haqqında Azərbaycan Respublikası Prezidentinin təqdimatına baxılıb.
Naxçıvan Muxtar Respublikası Ali Məclisi sədrinin müavini Anar İbrahimov gündəlikdə duran bu məsələ və namizəd barədə məlumat verdikdən sonra təqdimat oxunub. “Ceyhun Ramiz oğlu Cəlilovun Naxçıvan Muxtar Respublikasının Baş naziri təyin edilməsi haqqında” Naxçıvan Muxtar Respublikası Ali Məclisinin Qərarı səsə qoyularaq qəbul edilib. Anar İbrahimov Prezident İlham Əliyevin yüksək etimadı ilə yeni vəzifəyə təyin olunması münasibətilə Ceyhun Cəlilovu Ali Məclis adından təbrik edib, muxtar respublika hökumətinin yeni rəhbərinə məsul fəaliyyətində uğurlar arzulayıb.
Ceyhun Cəlilov yüksək etimada görə Prezident İlham Əliyevə dərin minnətdarlığını bildirib. O qeyd edib ki, ölkənin hərtərəfli tərəqqi strategiyasının davamı olaraq, “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nda bu il yaranmasının 100 illiyi tamam olan muxtar diyarın inkişafının prioritet istiqamətləri müəyyən edilib. Qarşıda duran vəzifələrin kompleks və uğurla icra edilməsində səylərini əsirgəməyəcəyini deyən baş nazir muxtar respublika rəhbərliyinə, təqdimatı yekdilliklə qəbul etdiyinə görə deputatlara təşəkkür edib.
Ali Məclisin iclasında yeni baş nazirin təyin edilməsi ilə bağlı Səbuhi Məmmədovun həmin vəzifədən, Ceyhun Cəlilovun isə yeni təyinatla əlaqədar muxtar respublikanın əmək və əhalinin sosial müdafiəsi naziri vəzifəsindən azad edilmələri barədə qərarlar səsə qoyularaq qəbul edilib.
XQ
