Xəbər verdiyimiz kimi, Azərbaycan Prezidentinin sərəncamı ilə bu il 8 Mart Beynəlxalq Qadınlar Günü münasibətilə ölkənin ictimai həyatında səmərəli fəaliyyət göstərən bir qrup qadın “Tərəqqi” medalı ilə təltif edilib. Dünən Ailə, Qadın, Uşaq Problemləri üzrə Dövlət Komitəsində medalların təqdim edilməsi mərasimi keçirildi. 

Komitə sədri Bahar Muradova təltif olunanları təbrik edərək bildirdi ki, ta­rixən, qadınlarımız cəmiyyətdə önəmli rol oynayıblar, xalqımıza layiqli övladlar bəxş etməklə yanaşı, özləri də gələcək nəsillərə örnək olan ömür yaşayıblar. Bugünkü qadınlarımız da həyatın bütün sahələrində səmərəli fəaliyyət göstərirlər, gənc nəslin sağlam böyüməsində, döv­lətçiliyimizə sevgi və sədaqət ruhunda tərbiyələnməsində əsas ağırlığı çiyin­lərində və qəlblərində daşıyırlar. Qara­bağı 30 illik işğaldan da məhz bugünkü anaların böyüdüb tərbiyə verdikləri igid oğullarımız xilas etdilər. Müstəqil dövlə­timiz qadınların bu əməyini və fədakar­lığını daim yüksək dəyərləndirir, ictimai həyatda fəallıq göstərən, fərdi uğurları ilə seçilən qadınlarımızın nümunəsini geniş təşviq edir.

Bahar Muradova qeyd etdi ki, Azər­baycan Prezidenti İlham Əliyev fəal qa­dınların səmərəli əməyinin qiymətləndiril­məsi ənənəsinə sadiq qalaraq bu il də 8 Mart Qadınlar Günü münasibətilə ölkənin müxtəlif bölgələrini təmsil edən, ayrı-ay­rı sahələrdə nailiyyətləri ilə fərqlənən bir qrup qadını “Tərəqqi” medalı ilə təltif etdi. Qadınlarımızın müstəqil ölkəmizə xidmətlərinin layiqincə qiymətləndirilməsi onları yeni nailiyyətlərə ruhlandırır, icti­mai həyatda üstün stimullar yaradır.

Sonra Bahar Muradova dövlət təltiflə­rini sahiblərinə təqdim edərək onlara yeni uğurlar arzuladı.

Təltif edilənlər əməklərinə verilən yük­sək qiymətə görə Prezident İlham Əliyevə minnətdarlıqlarını bildirdilər, bundan son­ra da xalqımıza və dövlətimizə xidmətləri­ni davam etdirəcəklərini söylədilər.

“Tərəqqi” medalı ilə təltif edilən qadınlar arasında “Xalq qəzeti”nin əməkdaşı Zərifə Hüseynova da var. Həmkarımızı səmimi təbrik edir, ona yeni uğurlar arzulayırıq.

Elşən AĞALAR
XQ