Mingəçevir Dövlət Universitetində (MDU) Humanitar fənlər kafedrasının təşkilatçılığı ilə 31 Mart Azərbaycanlıların Soyqırımı Gününə həsr olunmuş mərasim keçirilib.

MDU-dan “XQ”yə verilən məlumata görə, mərasim “Azərbaycan xalqının ta­rixi yaddaşından silinməyən soyqırımı” mövzusuna həsr olunub. Universitetin humanitar fənlər kafedrasının müdiri, do­sent Esmira Cəfərova 1918-ci ildə Azər­baycan xalqı və dövlətçiliyinin tarixində baş vermiş faciəli hadisələrdən, tarix boyu ermənilərin öz havadarlarına söykənərək azərbaycanlılara qarşı təcavüzkar siyasət yeritdiklərindən, 1998-ci ildə ümummilli lider Heydər Əliyevin imzaladığı fərmanla soyqırımı hadisələrinə hüquqi qiymət ve­rilməsindən bəhs edib. Bildirilib ki, bu gün Prezident İlham Əliyevin rəhbərliyi ilə apa­rılan uğurlu siyasət nəticəsində Azərbay­canın haqq səsi artıq dünya ictimaiyyəti tərəfindən qəbul olunur.

Mövzu ilə əlaqədar videoçarx nü­mayiş etdirilib. Sonra humanitar fənlər kafedrasının müəllimi, tarix üzrə fəlsəfə doktoru Aygün Qədirovanın mühazirəsi dinlənilib. O, 31 Mart soyqırımının ermə­nilərin xalqımıza qarşı həyata keçirdiyi böyükmiqyaslı terror aktlarından biri kimi tarixə yazıldığını söyləyib. Qeyd edilib ki, bu gün Ali Baş Komandan İlham Əliyevin rəhbərliyi altında erməni təcavüzünün nəticələri aradan qaldırılıb, respublika­mızın ərazi bütövlüyü və suverenliyi tə­min olunub, aparıcı dünya dövlətləri və nüfuzlu beynəlxalq dairələr tərəfindən ölkəmizin ədalətli mövqeyinin etiraf olun­ması və müdafiəsi istiqamətində ardıcıl və məqsədyönlü işlər görülür. 

Mövzu ətrafında aparılan müza­kirələrdən sonra iştirakçıların sualları ca­vablandırılıb.

XQ