Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli “Türk dünyasına açılan Şərq Qapısı: Naxçıvan – 100” konfransının iştirakçısı olan Türk Ağsaqqalları Birliyinin rəhbər heyəti ilə görüşüb.
Fuad Nəcəfli qonaqlara Naxçıvanda həyata keçirilən sosial-iqtisadi inkişaf tədbirlərindən – su təminatı, energetika, infrastruktur quruculuğu, təhsil, səhiyyə, kənd təsərrüfatı və digər istiqamətlərdə reallaşdırılacaq çoxprofilli layihələr barədə məlumat verib. Səlahiyyətli nümayəndə bildirib ki, Naxçıvan inkişafının yeni mərhələsini yaşayır, 2023–2027-ci illərdə sosial-iqtisadi inkişafa dair dövlət proqramının icrası çərçivəsində muxtar respublikada 11 prioritet sahə üzrə mühüm layihələr reallaşdırılacaq. Naxçıvan Azad İqtisadi Zonaya çevrilməklə investorların xüsusi diqqətini cəlb edəcək.
Türk Ağsaqqalları Birliyinin sədri Sudeyf İmamverdiyev, qurumun rəhbər heyətində təmsil olunan Milli Məclisin deputatı Musa Qasımlı, Dünya Türkologiya Mərkəzinin sədri Güllü Yoloğlu, AzTV Akademiyasının rektoru Telli Pənahqızı Naxçıvanın Azərbaycan tarixində və müstəqil dövlətçiliyimizdə xüsusi yerini vurğulayaraq, muxtar diyar əhalisinə xoş günlər arzulayıblar.
XQ