Belarus ədliyyə nazirinin birinci müavini xanım Nataliya Filippovanın başçılıq etdiyi nümayəndə heyəti Azərbaycanda səfərdə olub.
Nümayəndə heyəti Azərbaycanın ixrac edilən brendi olan “ASAN xidmət” və DOST mərkəzlərində olub, dövlət xidmətləri sahəsində yeni təcrübə əldə etdiklərini söyləyiblər.
Qonaqlar rəqəmsal ədliyyə, elektron və mobil ədliyyə xidmətlərinə, süni intellektin tətbiqi ilə vətəndaşlara məsafədən eyni vaxtda müxtəlif ədliyyə xidmətlərinin göstərilməsini mümkün edən “ƏNTEZ” xidmət platformasına böyük maraq göstəriblər. Bununla bağlı nazirlikdə geniş təqdimat keçirilib, həmçinin DOST mərkəzində “ƏNTEZ”-in fəaliyyəti ilə əyani tanışlıq olub.
Səfər zamanı Ədliyyə Nazirliyində Belarusun nümayəndə heyəti ilə ədliyyə naziri F.Məmmədovun görüşü keçirilib.
Görüşdə ölkələrimiz arasında strateji tərəfdaşlıq səviyyəsinə yüksələn əməkdaşlıq münasibətlərinin müxtəlif, o cümlədən hüquqi sahədə inkişafından məmnunluq ifadə olunub, Ədliyyə nazirlikləri arasında səmərəli qarşılıqlı fəaliyyətə toxunularaq bu əlaqələrin dərinləşdirilməsi üçün geniş perspektivlərin olduğu bildirilib.
XQ