Əsərin Almaniya nəşri ölkəmizdə təqdim olunub
Dünən Azərbaycan Milli Kitabxanasında görkəmli yazıçı və ədəbiyyatşünas alim Mir Cəlal Paşayevin Almaniyanın “Erqon-Nomos” nəşriyyatında “Bibliotheca Academica” seçilmiş nəşrlər seriyasında çap olunan “Füzuli sənətkarlığı” kitabının təqdimatı keçirilib.
Mədəniyyət Nazirliyi və Milli Kitabxananın təşkilatçılığı ilə reallaşan mərasimdə ADA Universitetinin rektoru Hafiz Paşayev, kitabı alman dilinə çevirmiş Giesen Universitetinin dosenti, şərqşünas-alim Mixael Raynhard Hess, mədəniyyət naziri Adil Kərimli, tanınmış elm və mədəniyyət xadimləri iştirak ediblər.
Milli Kitabxananın direktoru, professor Kərim Tahirov Mir Cəlalın ədəbi-ictimai fəaliyyəti, Azərbaycan ədəbiyyatına bəxş etdiyi ölməz əsərlər haqqında ətraflı məlumat verib.O bildirib ki, klassik poeziyamızın mahir bilicisi Mir Cəlal 1940-cı ildə “Füzulinin poetik xüsusiyyətləri” mövzusunda müdafiə etdiyi namizədlik dissertasiyasını 1958-ci ildə genişləndirərək “Füzuli sənətkarlığı” adlı monoqrafiyanı nəşr etdirib. Ədibin əsərləri bu gün də aktuallığını qoruyub saxlayır.
AMEA prezidenti, akademik İsa Həbibbəyli Mir Cəlalın bir alim, bir nasir kimi yorulmaz fəaliyyətindən söhbət açıb. Şərqşünaslıq İnstitutunun direktoru, akademik Gövhər Baxşəliyeva təqdim edilən əsərin Füzuli irsinin dərindən öyrənilməsində önəmli mənbə olduğunu söyləyib. AMEA-nın Əlyazmalar İnstitutunun direktoru akademik Teymur Kərimli XX əsr dünya Füzulişünaslığında Mir Cəlal müəllimin öz kürsüsü, öz yeri olduğunu bildirib.
AMEA-nın müxbir üzvü, BDU-nun professoru Təhsin Mütəllimov, Ədəbiyyat İnstitutunun şöbə müdiri, Əməkdar elm xadimi, professor Qəzənfər Paşayev, Xarici İşlər Nazirliyinin idarə rəisi Rizvan Nəbiyev qeyd ediblər ki, Mir Cəlalın “Füzuli sənətkarlığı” əsəri dahai şairin irsinin ölkəmizdə və xaricdə öyrənilməsi və tədqiqində mötəbərliyi və geniş istifadə ilə seçilir.
ADA Universitetinin rektoru Hafiz Paşayevin atası haqqında xatirələri də maraqla qarşılanıb. O, eyni zamanda, yazıçıya verilən yüksək qiymətə görə təşkilatçılara və çıxışçılara təşəkkürünü bildirib.
***
Görkəmli yazıçı-ədəbiyyatşünas və pedaqoq Mir Cəlal Paşayevin alman dilində nəşr edilmiş “Füzuli sənətkarlığı” kitabı həmin gün unudulmaz ədibin uzun illər çalışdığı Bakı Dövlət Universitetində də elmi-mədəni ictimaiyyətə təqdim edilib.
ADA Universitetinin rektoru Hafiz Paşayevin, tanınmış alim və mütəxəssislərin iştirak etdikləri mərasimdə əvvəlcə Mir Cəlal Paşayevin ömür yolundan bəhs edən videoçarx nümayiş olunub. Sonra BDU-nun rektoru Elçin Babayev Mir Cəlalın elmi araşdırmalarından, zəngin yaradıcılığından, ədəbiyyatımıza verdiyi əvəzsiz töhfələrdən danışıb. O bildirib ki, Azərbaycan elminin, təhsilinin, ədəbiyyatının inkişafında, xüsusən, BDU-da çoxsaylı ədəbiyyatçı və dilçi kadrların hazırlanmasında Mir Cəlalın müstəsna xidmətləri olub.
Xarici İşlər Nazirliyinin idarə rəisi Rizvan Nəbiyev Mir Cəlalın “Füzuli sənətkarlığı” monoqrafiyasının Almaniyada nəşrinin milli ədəbiyyatımızın 2 böyük nümayəndəsinin almandilli auditoriyada daha geniş tanıdılmasında önəmini vurğulayıb. Mixael Hess isə görkəmli alim və yazıçı Mir Cəlalın ədəbi-elmi irsinə Almaniyada olan böyük maraqdan bəhs edib.
BDU-nun professorları Təhsin Mütəllimov və Jalə Əliyeva, filologiya fakültəsinin baş müəllimi Mətanət Əliyeva və dosenti Məti Osmanoğlu Mir Cəlal Paşayevin geniş elmi və pedaqoji fəaliyyətindən, ədəbi yaradıcılığından danışıblar. Onlar təqdim olunan kitabın tariximiz, ədəbiyyatımız üçün dəyərli mənbə olduğunu bildiriblər.
Anar TURAN
“XQ”