Azərbaycan Milli Antidopinq Agentliyi (AMADA) dopinqlə mübarizəyə istiqamətlənmiş maarifləndirmə tədbirləri davam etdirir.
Bu dəfə AMADA “Qəbələ Futbol Klubu” Akademiyasının U-15, U-16, U-17 və U-19 komandaları üçün antidopinq maarifləndirmə seminarı təşkil edib. Tədbirdə dopinq nəzarəti ilə bağlı əsas mövzular müzakirə edilib. Nümunələrin toplanmasından laboratoriya təhlilinədək dopinq nəzarəti prosesinin bütün aspektləri idmançıların diqqətinə çatdırılmaqla yanaşı, onlara 11 antidopinq qayda pozuntusu haqqında da ətraflı məlumat verilib. Həmçinin idmançıların hüquq və öhdəlikləri ilə bağlı önəmli məlumatlar paylaşılıb, dürüst idman mühitini qorumaq üçün məsuliyyət və öhdəlikləri vurğulanıb.
AMADA-nın təhsil proqramları üzrə meneceri Qüdrət Səfərov maarifləndirmə tədbirlərinin əsas məqsədinin idman ictimaiyyətinə və ümumiyyətlə cəmiyyətə dopinqın insan sağlamlığı üçün zərərləri və təhlükələri haqqında geniş məlumat vermək, həmçinin idmanda dürüstlüyü və ədaləti qorumaq olduğunu bildirib.
AMADA antidopinq sahəsində təhsil və maarifləndirmə proqramlarını Ümumdünya Antidopinq Məcəlləsinin “Təhsil üzrə Beynəlxaq Standart”ına uyğun olaraq həyata keçirir. Standartın tələblərinə əsasən təhsil və maarifləndirmə uyğunlaşdırılmış proqramlar əsasında həyata keçirilir. Təlimlər çərçivəsində narkotiklərlə mübarizə mövzusu xüsusi yer tutur. İdmançılara və idmançıların köməkçi heyətinə narkotiklərin zərərləri, onun törətdiyi fəsadları haqqında məlumatlar verilir, narkotik və digər zərərli vərdişlərdən uzaq durmaq, sağlam həyat tərzi üçün idmanın əhəmiyyəti vurğulanır.
L.QURBANOVA
XQ