Xəbər verildiyi kimi, görkəmli teatr və kino aktyoru, Xalq artisti, Dövlət mükafatı laureatı, “Şöhrət” ordenli Ramiz Məlik 2023-cü il dekabrın 14-də dünyasını dəyişib. Paytaxtın Heydər Məscidində keçirilən vida mərasimində mərhumun ailə üzvləri, sənət dostları, ölkənin mədəniyyət xadimləri və ictimaiyyət nümayəndələri iştirak ediblər.

Azərbaycan Dövlət Akademik Milli Dram Teatrının bədii rəhbəri Mehriban Ələkbərzadə mərasimdə görkəmli akt­yorun milli mədəniyyətimizə göstərdiyi səmərəli xidmətdən danışıb: “Ramiz Məlik çağdaş səhnəmizin istedadlı və fədakar simalarından biri idi. Uzun müddət idi xəstəlikdən əziyyət çəkirdi, amma biz ümid edirdik o qayıdacaq. Hətta teatrda rol da ayırmışdıq. Bax­mayaraq ki, xəstəliyi ağır idi, amma yaşamaq və sənət eşqi yüksək idi. Təəssüflər olsun ki, onu itirdik. Ramiz Məlikin sənət irsi dogma xalqına layiqli yaradıcılıq töhfəsi kimi daim yaşaya­caq, xatirəsi əbədi olaraq yaddaşlarda qalacaq”. 

Xalq artisti Hacı İsmayılov bir çox tamaşalarda Ramiz Məliklə birgə oyu­nunu, xüsusən “Ad günü” filminə çə­kilişləri xatırlayıb: “Ramiz Məlik çox bacarıqlı, çalışqan və iradəli aktyor idi. Uzun müddət xəstə olmasına baxma­yaraq, sənət eşqi ilə yaşayır, yenidən səhnəyə can atırdı. Təəssüf ki, bu, mümkün olmadı. Akademik Milli Dram Teatrının kollektivi və Azərbaycan Teatr Xadimləri İttifaqı adından Ramiz Məli­kin ailəsinə, doğmalarına başsağlığı verirəm”.

Azərbaycan Dövlət Akademik Mu­siqili Teatrının direktoru Əliqismət La­layev isə Ramiz Məlikin hər zaman tamaşaçıların sevimlisi olduğunu, rən­garəng və təsirli obrazlar yaratdığını diqqətə çatdırıb: “Bizim Ramiz müəl­limlə yaxşı münasibətimiz olub. Bir aktyor kimi onu çox sevmişəm. Bu gün onu ürək ağrısı ilə son mənzilə yola sa­lırıq”. 

Əməkdar artist Ayşad Məmmə­dov isə mərhum sənətkarla ilk dəfə Hüseyn Cavidin yubiley mərasimində təqdim edilən tamaşada eyni səhnəni bölüşdüyünü deyib: “O, Hüseyn Cavi­di, mən isə Arif obrazını oynayırdım. O da vaxtilə Arif rolunu oynamışdı. Buna görə sonralar zarafatla məni Arif deyə çağırırdı. Daha sonra Cəfər Cabbarlı­nın “Yaşar” pyesində birgə oynamışıq. Allah rəhmət eləsin, ruhu şad olsun”.

Mərasimdə bildirilib ki, Ramiz Ağar­za oğlu Məlik 1943-cü il avqustun 4-də Bakı şəhərində anadan olub. 1967-ci ildə Azərbaycan Dövlət Teatr İnstitutu­nun dram və kino aktyorluğu fakültəsi­ni bitirib, həmin ildən taleyini Akademik Milli Dram Teatrı ilə bağlayıb. Ramiz Məlik ötən illər ərzində bu sənət oca­ğının səhnəsində dünya və milli dra­maturgiya nümunələri əsasında hazır­lanmış tamaşalarda 100-ə yaxın rolda uğurla çıxış edib. Onun aktyorluq mə­harəti kino və televiziya teatrı sahəsin­də də parlaq əksini tapıb. “Mehman”, “Bir cənub şəhərində”, “O qızı tapın”, “Sevinc buxtası”, “Babək”, “Qəm pən­cərəsi”, “Qara gölün cəngavəri” və s. bədii, “Şərqin səhəri”, “Günahsız Ab­dulla”, “Kimin sualı var?” və s. televi­ziya tamaşalarında yaratdığı obrazlar onun orijinal yaradıcılıq yolunun yadi­garlarıdır. Bacarığını rejissorluqda da sınayıb.Uzun illər film dublyajına böyük zəhmət sərf edib.

Milli teatr və kino sənəti sahəsin­dəki xidmətləri yüksək qiymətləndi­rilən Xalq artisti Ramiz Məlik 1984-cü ildə respublikanın Dövlət mükafatına, 2019-cu ildə “Şöhrət” ordeninə, 2023-cü ildə isə “Azərbaycan Respublikası Prezidentinin fəxri diplomu”na layiq görülüb. 2005-ci ildən Prezidentin fərdi təqaüdçüsü idi.

Görkəmli aktyorun sənət dostları da XQ-yə açıqlamalarında milli səh­nəmizə üz vermiş ağır itki barədə kədər və hüznlərini yanğı ilə ifadə ediblər. 

Sənubər İsgəndərli: – Ramiz Məlik həyatda da, sənətdə də səmi­mi, məğrur, görkəmli bir şəxsiyyət idi. Onun sənət yolu canlı örnəkdir. Layiqli sənət irsi qoyub getdi. Onun adı milli teatrımızın tarixində əbədi qalacaq. 

Nurəddin Mehdixanlı: – Təəs­süf ki, biz bu gün Ramiz Məliki itirdik. Xeyli müddət idi ki, xəstə idi, müalicə olunurdu, ona xüsusi diqqət, qayğı ilə yanaşılırdı. Ramiz Məlik Azərbaycan kino və teatrının görkəmli xadimi idi. Ramiz Məliklə uzun illər tərəf-müqabil olmuşuq. O, işinə, sevdiyi peşəsinə məsuliyyətli idi. Xatirəsi sənətsevər­lərin qəlbində əbədi yaşayacaq. Allah rəhmət eləsin.

Vida mərasimindən sonra Xalq ar­tisti Ramiz Məlik çoxsaylı sənətsevərin iştirakı ilə II Fəxri xiyabanda son mən­zilə yola salınıb.

XQ