Gələn ilin əvvəllərində Rusiya Prezidenti Vladimir Putinin Türkiyəyə səfəri planlaşdırılır. Bu barədə dövlət başçısı Rusiyada “Vladimir Putinlə ilin yekunları” proqramında birbaşa bağlantı zamanı türkiyəli jurnalistə açıqlamasında bildirib. Xəbəri “Anadolu” agentliyi yayıb.
Məlumatda sonra deyilir ki, Qəzza bölgəsində vəziyyətə münasibətini bildirən Rusiya Prezidenti deyib: “Türkiyə Prezidenti Rəcəb Tayyib Ərdoğanın Qəzzada vəziyyətin bərpasında xüsusi liderlik rolunu qeyd etmək istəyirəm. O, sözsüz ki, bu faciəyə diqqəti cəlb edən və vəziyyətin yaxşılığa doğru dəyişməsi, uzunmüddətli sülh üçün şərait yaradılması üçün əlindən gələni edən dünya liderlərindən biridir. Bu, aydındır. Allah ona cansağlığı versin”.
V.Putin Qəzzada baş verənləri “faciə” adlandırıb və vurğulayıb ki, Rusiya da Türkiyə kimi hesab edir ki, Fələstində paytaxtı Şərqi Qüds olmaqla dövlət qurulmalı, İsrail-Fələstin münaqişəsinin həlli üçün fundamental zəmin yaradılmalıdır. “Biz Prezident Ərdoğanla bu məsələlərlə bağlı daim əlaqədəyik. Bizim mövqelərimiz oxşardır. Düşünürəm ki, biz onunla görüşə biləcəyik”, - deyə V.Putin qeyd edib.
Rusiya Prezidenti əlavə edib ki, bir müddət əvvəl Türkiyəyə səfəri planlaşdırılmışdı: “Prezident Ərdoğanın öz qrafiki ilə əlaqədar səfər baş tutmadı. Ümid edirəm ki, gələn ilin əvvəllərində Türkiyəyə səfərimi həyata keçirə biləcəyəm”.
Qeyd edək ki, bu il “Vladimir Putinlə ilin yekunları” proqramı ənənəvi birbaşa bağlantı və böyük mətbuat konfransını özündə birləşdirib. İlk dəfə belə format 2021-ci ildə tətbiq olunub. Rusiya Prezidenti canlı yayımda 2023-cü ilə yekun vurub, jurnalistlərin və əhalinin çoxsaylı suallarını cavablandırıb. V.Putinin ilk böyük mətbuat konfransı 2001-ci ildə təşkil olunub. Ötən dövr ərzində o, 17 dəfə illik yekun mətbuat konfransında iştirak edib.
Xatırladaq ki, Vladimir Putin Rusiyada 2024-cü ilin martında keçiriləcək prezident seçkilərində iştirakını təsdiqləyib. V.Putin birbaşa yayımda, həmçinin bildirib ki, Rusiya ilə Ukrayna arasında sülh xüsusi hərbi əməliyyatın məqsədlərinə tam nail olunduqdan sonra mümkündür.
V.Putin deyib ki, xüsusi hərbi əməliyyatın məqsədləri dəyişmir. Bu, Ukraynanın denatifikasiyası, demilitarizasiyası və neytral statusudur. Eyni zamanda, V.Putin qeyd edib ki, ölkədə ümumi hərbi səfərbərlik elan olunması gözlənilmir.
XQ