Dünən Milli Məclisin Əmək və sosial siyasət komitəsinin iclası keçirilib. Komitə sədri Musa Quliyev “Hərbi qulluqçuların statusu haqqında”, “Hərbi xidmətkeçmə haqqında” Əsasnamənin təsdiq edilməsi barədə”, “Əmək pensiyaları haqqında” və “Hərbi vəzifə və hərbi xidmət haqqında” qanunlarda dəyişiklik edilməsi barədə qanun layihəsini təqdim etdi.

Komitə sədri qanun layihəsinin si­lahlı qüvvələrimizin daha da güclənmə­si, hərbçilərin kadr hazırlığı, təhsili, xid­mətkeçmə, sosial müdafiə və pensiya təminatları sahəsində hüquqi bazanın möhkəmləndirilməsi məqsədi ilə hazır­landığını bildirdi.

Sonra deputat Arzu Nağıyev qanun layihəsinə təklif olunan dəyişikliklər barədə deputatlara ətraflı məlumat ve­rib. O, qanun layihəsinin hərbi qulluqçu­ların pensiya və təhsil almaq hüququ, o cümlədən, xidmətkeçmə müddətləri ilə bağlı dəyişikliklərin nəzərdə tutilduğunu diqqətə çatdırdı..

Hərbi qulluqçuların potensialından daha uzun müddət və səmərəli istifa­də edilməsinə yönəlik dəyişikliklərdən danışan A.Nağıyev qeyd etdi ki, sənəd­də hərbi qulluqçuların təhsil almaq imkanları genişləndirilir. O, layihədə qadınların həqiqi hərbi xidmətdə ehti­yatda olmalarının son yaş hədlərinin kişi hərbi qulluqçularla bərabərləşdiril­məsinin gender bərabərliyinin təmininə xidmət etdiyini bildirdi. Hərbi qulluqçu­ların formalaşmış təcrübəsindən daha uzun müddət istifadə etmək məqsədilə hərbi qulluqçu kimi pensiyaya çıxmaq üçün minimum xidmətkeçmə tələbinin 20 təqvim ilindən 25 təqvim ilinə çat­dırılması hərbi qulluqçuların pensiya təminatında hər hansı azalmanı istisna etməklə, bir sıra qurumların hərbi qul­luqçularının pensiya təminatında artımı nəzərdə tutur. Belə ki, minimum xidmət müddətinin artırılması ilə yanaşı, hə­min dövrə görə qulluq stajına əlavənin 50-dən 65 faizə qaldırılması təklif edilib.

Müdafiə Nazirliyinin Hüquq İdarə­sinin rəisi Elçin Əliyev vurğulayıb ki, parlamentin müzakirəsinə təqdim olun­muş layihə hərbi qulluqçuların potensi­alından daha uzun müddət və səmərəli istifadə edilməsinə və onların peşəkar­lığının və sosial müdafiəsinin gücləndi­rilməsinə xidmət edir.

Əmək və Əhalinin Sosial Müdafiə­si Nazirliyinin Sosial sığorta və pen­siya siyasəti şöbəsinin müdiri Elnur Abbasov isə qanun layihəsinin hərbi qulluqçuların sosial müdafiəsinin güc­ləndirilməsinin və pensiya təminatının möhkəmləndirilməsinin daha səmərəli təşkilinə imkan yaratdığını bildirib.

Sənədin müzakirəsində deputatlar çıxış edərək layihə ilə bağlı fikirlərini bildirdilər.

Sonda qanun layihəsi birinci oxu­nuşda baxılmaq üçün Milli Məclisin ple­nar iclasına tövsiyə olundu.

Ə.BƏDƏLOV
XQ