İşğaldan azad edilmiş ərazilərdə ilk dəfə olaraq Azərbaycanın və Özbəkistanın qeyri-hökumət təşkilatlarının əməkdaşlıq Forumunun açılış paneli keçirilib. Tədbir Füzuli şəhər Mirzə Uluqbəy adına tam orta məktəbdə təşkil olunub. 

Prezident Administrasiyasının Qey­ri-hökumət təşkilatları ilə iş və kommu­nikasiya şöbəsinin nümayəndəsi Tural Əliyev deyib ki, bu gün Azərbaycan-Öz­bəkistan münasibətləri ən yüksək sə­viyyədədir. “Bu tarixi uğur Azərbaycan Prezidenti İlham Əliyev və Özbəkistan Prezidenti Şavkat Mirziyoyevin yürüt­dükləri uzaqgörən siyasətə söykənir”, - deyə o qeyd edib. 

Özbəkistanın Azərbaycandakı səfiri Bahrom Aşrafxanov iki ölkə arasında əməkdaşlığın QHT-lər sahəsində də in­kişafının önəmini vurğulayıb. 

Azərbaycan Respublikasının Elm və Təhsil Nazirliyinin Elm, ali və orta ixtisas təhsili şöbəsinin müdiri Turxan Süleyman Özbəkistan dövlətinin Azər­baycana hədiyyəsi olan Mirzə Uluq­bəy adına tam orta məktəbin imkanları barədə danışıb. 

Özbəkistan Qeyri-Hökumət Qey­ri-Kommersiya Təşkilatları Milli Asso­siasiyasının İdarə Heyətinin sədri Ka­moliddin İşanxocayev iki ölkə arasında əlaqələrin QHT-lər sahəsində də inki­şafı üçün bu Forumun vacib təkan ola­cağını qeyd edib. 

***

Forumda “İmkanlar və perspek­tivlər” mövzusunda panel müza­kirələri təşkil edilib. Müzakirələrin sonunda sual-cavab sessiyası keçi­rilib. 

Yekunda təşkil olunan konsert proq­ramında Azərbaycanın tanınmış sənət adamları xalq və bəstəkar mahnıların­dan ibarət musiqi nömrələri ifa ediblər. 

***

Forumda Özbəkistanın və Azər­baycanın vətəndaş cəmiyyətlərinin təmsilçiləri hər iki ölkənin dövlət başçılarına birgə müraciət ünvala­yıblar.

Müraciətdə deyilir: “Biz – Özbəkis­tanın və Azərbaycanın vətəndaş cəmiy­yəti təmsilçiləri hər iki qardaş ölkənin dövlət başçılarına – Türk dünyasının nəhəng şəxsiyyətləri olan Prezident İl­ham Əliyevə və Prezident Şavkat Mir­ziyoyevə Qarabağdan müraciət etmək­dən bəxtiyarlıq duyuruq.

Sizlərə bu müraciəti qəbul etdiyimiz məkan da rəmzidir. Füzuli şəhərində özbək xalqının dahi oğlu Mirzə Uluq­bəyin adını daşıyan təhsil ocağı, eyni zamanda, Özbəkistanın və Azərbay­canın daha bir dostluq və qardaşlıq mərkəzidir. Qarabağın bərpası və qu­ruculuğu işinə Özbəkistanın hədiyyəsi olan bu məktəb həmrəyliyimizin parlaq nümunəsidir. 

Bu gün bütün dünya Özbəkistanın və Azərbaycanın dostluğuna, birliyinə, bütün beynəlxalq platformalarda bir-bi­rini necə müdafiə etməsinə şahiddir. Azərbaycan-Özbəkistan münasibətləri tarixdə heç vaxt belə yüksək səviyyədə olmayıb. Bu, məhz Sizlərin xidmətidir – cənab Prezident İlham Əliyev və cənab Prezident Şavkat Mirziyoyev!

Biz – hər iki ölkənin vətəndaş cə­miyyəti təmsilçiləri olaraq, bu şəxsi nümunəyə, böyük əməyə, Türk dünya­sının güclənməsi, Azərbaycan və Öz­bəkistanın inkişaf etmiş dövlətlərə çev­rilməsi naminə tarixi fəaliyyətinizə görə Sizlərə sonsuz təşəkkür edirik!

Məhəmməd Füzulinin uzun əsrlər­dən bəri Özbəkistanda qorunub sax­lanan əlyazmalarından birini 2022-ci ildə Daşkənddə Özbəkistan Prezidenti Azərbaycan Prezidentinə hədiyyə etdi. Dahi şair-mütəfəkkir Məhəmməd Füzu­linin adını daşıyan Füzuli rayonunda bu hadisəni xatırlamamaq mümkün deyil. Qədirbilən özbək xalqı özbək ədəbiyya­tının və poeziyasının banisi Əlişir Nə­vainin böyük Nizami Gəncəvinin əsər­lərindən ilham almasını, onu “şairlərin şahı” adlandırmasını unutmur.

Bu gün Azərbaycan və Özbəkistan dünya miqyaslı güclü siyasi liderlərinə görə sülh və sabitlik adası kimi sürətlə inkişaf edir. Dünyanın müxtəlif region­larındakı qanlı hadisələri, toqquşmala­rı, sonu görünməyən müharibələri ürək ağrısı ilə izləyirik. Bizim ölkələrimiz də bu fəlakətlərə düçar ola bilərdi. Ancaq Azərbaycan və Özbəkistan xalqları müdrik seçimlərində yanılmadılar, on­lar ölkələrinin talelərini Prezident İlham Əliyevə və Prezident Şavkat Mirziyo­yevə etibar etdilər.

Biz Özbəkistanın və Azərbaycanın vətəndaş cəmiyyəti təmsilçiləri olaraq, Sizlərə üz tutub bildirmək istəyirik ki, apardığınız siyasəti tam müdafiə edirik, Sizlərin yanındayıq!

Biz Azərbaycanı sevirik! Biz Özbə­kistanı sevirik!

Yaşasın Özbəkistan-Azərbaycan dostluğu, qardaşlığı!”

***

Özbəkistanın Qeyri-Hökumət Qeyri-Kommersiya Təşkilatları Mil­li Assosiasiyasının geniş tərkibdə nümayəndə heyəti Şuşanın görməli yerlərini gəzib, şəhərlə tanış olublar.

XQ