Görkəmli yazıçı və ədəbiyyatşünas Mir Cəlal Paşayevin “Füzuli sənətkarlığı” kitabı Almaniyanın tanınmış Erqon-Nomos nəşriyyatının “Bibliotheca Academica” - şərqşünaslıq sahəsində seçilmiş nəşrlər sırasında çap edilib. Əsəri alman dilinə Giesen Universitetinin dosenti, şərqşünas Mixael Raynhard Hess tərcümə edib.
Alman alimin, Füzulinin dövrünün tələblərinə uyğun olaraq Azərbaycan, türk, ərəb və fars dillərini bilməsi ona Füzuli və Mir Cəlal yaradıcılığının dərinliklərini araşdırmağa və avropalı oxuculara təqdim etməyə imkan verdi. Şərqşünas-alim Hess, həmçinin kitaba “Giriş sözü” yazaraq, həm Füzuli, həm də Mir Cəlal dövrünün ədəbi və tarixi-siyasi mühitinin elmi-tənqidi təhlilini aparıb.
Mixael Raynhard Hess bildirir: “Yazıldığı tarixdən 80 il keçməsinə baxmayaraq, Füzuli yaradıcılığı haqqında Mir Cəlalın elmi əsəri ilə müqayisə oluna bilinəcək dərinlik və müfəssəlliyə malik elmi əsər yazılmayıb. Bu gün də bu əsər Füzuli yaradıcılığının araşdırmaçıları üçün əvəzolunmaz mənbədir”.
Füzuli dühasının araşdırılmasına həsr olunan bu monoqrafiyanın alman dilində nəşri Mir Cəlal yaradıcılığının avropalı oxuculara çatdırılmasına dəyərli töhfədir. Kitab Almaniyanın milli biblioqrafiyasına daxil edilib.
XQ