Nazirlər Kabineti “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın 2023–2024-cü illər üzrə Təfsilatlı Tədbirlər Planı”nı təsdiq edib.
Bununla bağlı baş nazir Əli Əsədov yeni sərəncam imzalayıb. Maliyyə və İqtisadiyyat nazirlikləri, Prezidentin Naxçıvandakı səlahiyyətli nümayəndəliyi və muxtar respublikanın Nazirlər Kabinetinə bu sərəncamdan irəli gələn məsələlərin həll elməsi tapşırılıb.
Tədbirlər Planında 2023–2024-cü illərdə muxtar respublikada sahibkarlara güzəştli kreditlərin verilməsi ilə bağlı məqsədli limitin ayrılması nəzərdə tutulur. Sənəddə bu məsələ ilə bağlı icraçı qurumun Kənd Təsərrüfatı Nazirliyi olduğu bildirilir.
Bundan başqa, muxtar respublikada sahibkarlıq subyektlərinin güzəştli maliyyə resurslarına çıxış imkanlarının artırılması məqsədilə təşviqat tədbirlərinin həyata keçirilməsi, sahibkarlıq subyektlərinin (sahibkarların) dövlətin güzəştli maliyyə dəstəyi mexanizmləri barədə məlumatlılıq səviyyəsinin artırılması məqsədilə tədbirlərin həyata keçirilməsi də planlaşdırılır. Eyni zamanda, Tədbirlər Planında muxtar respublikada azad iqtisadi zonanın yaradılması ilə bağlı qanun layihəsinin gələn il hazırlanaraq təqdim olunacağı vurğulanır.
XQ
