Dünən Azərbaycanın ədliyyə naziri Fikrət Məmmədov Naxçıvan Muxtar Respublikasında olub.
Bu barədə Ədliyyə Nazirliyinin mətbuat xidmətindən məlumat verilib. Bildirilib ki, Prezidentin səlahiyyətli nümayəndəsi Fuad Nəcəfli ilə görüş keçirilərək Naxçıvanda ədliyyə və məhkəmə orqanlarının fəaliyyətinin təkmilləşdirilməsi ilə bağlı faydalı fikir mübadiləsi aparılıb.
Sonra Ədliyyə Nazirliyində keçirilən qəbulda Naxçıvan, Babək, Culfa, Kəngərli, Ordubad, Sədərək, Şahbuz və Şərur rayonlarından olan vətəndaşların müraciətləri dinlənilib, qaldırılan məsələlərə dair aidiyyəti tapşırıqlar verilib. Bu zaman Vətən müharibəsi iştirakçılarının və şəhid ailələrinin qayğılarına xüsusi həssaslıqla yanaşılıb.
Səfər zamanı Fikrət Məmmədov nazirliyin iş şəraiti ilə tanış olub, ədliyyə işçiləri ilə görüşüb. Nazir bu il 100 illiyini qeyd etdiyimiz ulu öndər Heydər Əliyevin mənalı ömründən və zəngin dövlətçilik irsindən bəhs edib.
Bildirib ki, Ümummilli liderin əbədi həyat verdiyi müstəqil Azərbaycan dövləti bu gün Ulu öndərin siyasi varisi, Prezident, müzəffər Ali Baş Komandan İlham Əliyevin rəhbərliyi ilə özünün ən qüdrətli dövrünü yaşayır. Vətən müharibəsində doğma torpaqlarımız işğaldan azad edilərək sürətlə bərpa olunur, bu istiqamətdə Birinci vitse-prezident Mehriban xanım Əliyevanın təşəbbüsü ilə Heydər Əliyev Fondu tərəfindən mühüm layihələr həyata keçirilir.
Müşavirədə, həmçinin aparılan islahatlarından danışılıb, muxtar respublikanın Ədliyyə Nazirliyinin strukturunun yeni çağırışlara uyğun təkmilləşdirilməsi, ədliyyə orqanlarının, o cümlədən, məhkəmə ekspertizası fəaliyyətinin müasirləşdirilməsi və digər məsələlər müzakirə olunub, tapşırıqlar verilib.
XQ