Elm və Təhsil Nazirliyinin Yüksək Texnologiyalar Parkında (YTP) İstanbul Aydın Universitetinin Magistratura Təhsili İnstitutunun direktoru, professor Ragıp Kutay Karaca ilə görüş keçirilib.
YTP-dən redaksiyamıza bildirilib ki, görüşdə baş direktor Vasif Abbasov və tanınmış şəxslər iştirak ediblər. Öncə professor Karacaya texnoparkın əsas fəaliyyət istiqamətləri, istehsal olunan məhsullar haqqında ətraflı məlumat verilib. Bildirilib ki, innovativ texnoloji yeniliklərin ölkəmizdə inkişaf etdirilməsi, cəmiyyətdə belə təşəbbüslərin artırılması ilə müvafiq sahibkarlığın formalaşmasına dəstək verən YTP Azərbaycanda elmtutumlu, rəqabətqabiliyyətli yeni məhsulların istehsalını həyata keçirir, özəl sektor, biznes şəbəkələri ilə əməkdaşlıq edir.
Daha sonra qonaq YTP-nin ərazisi, texnoparkın rezidentlərinin istehsal sahələri ilə yaxından tanış olub. Alimə istehsal olunan məhsullar barədə ətraflı məlumat verilib.
Professor Karaca texnoparkın rezidenti Təcrübə-Sənaye Zavodunda dünya standartlarına tam cavab verən mühərrik yağlarının istehsalı prosesini də izləyib. O, bundan başqa, Strateji Elmi Analitik Sınaq Mərkəzində qaz və maye karbohidrogenlərin, neft və neft-kimya məhsullarının və istehlak mallarında toksik elementlərin sınaqları, eləcə də digər təcrübə işləri ilə tanış olub.
“Xalq qəzeti”