“Qarabağ İtkin Ailələri” İctimai Birliyi Birləşmiş Millətlər Təşkilatına müraciət ünvanlayıb. Vətəndaş cəmiyyəti qurumudan qəzetimizə göndərilən həmin məktubun mətnində bildirilir:
– Ermənistanın Azərbaycana hərbi təcavüzü nəticəsində itkin düşmüş 3 min 890 nəfər azərbaycanlının ailə üzvlərini birləşdirən ictimai təşkilat kimi, itkin ailələri adından BMT-nin Baş katibi Antonio Quterreşə, BMT Baş Assambleyasının prezidenti Çaba Köröşiyə, BMT-nin İnsan Hüquqları Şurasının prezidenti Vatslav Balekə, BMT-nin İnsan Hüquqları üzrə Ali Komissarı Volker Türkə müraciət edirik.
Beynəlxalq humanitar hüququn və onun əsas mənbəyi olan 1949-cu il 12 avqust tarixli Cenevrə Konvensiyalarının tələblərinə əsasən, silahlı münaqişələr zamanı itkin düşmüş şəxslər barədə onların ailələrinin məlumat almaq haqqı birmənalı şəkildə tanınır və bu, insan kimi bizim hüququmuzdur. Lakin biz 30 ildən çoxdur ki, bu hüquqdan məhrumuq, Ermənistan itkin düşmüş azərbaycanlılar barədə məlumatları təqdim etməkdən imtina edir, bizi bitməyən əzaba, iztirablara məhkum edib.
Ermənistanın Azərbaycana qarşı hərbi təcavüzü nəticəsində Birinci Qarabağ müharibəsində itkin düşmüş şəxs kimi qeydiyyata alınan 4 minə yaxın azərbaycanlının 3 min 171 nəfəri hərbçi, 719 nəfəri mülki şəxslərdir. 71 nəfər yetkinlik yaşına çatmamış uşaq, 267 nəfəri qadın, 326 nəfəri qocadır. İtkin düşmüş şəxslərin ümumi sayından 872 nəfərin əsir-girov götürülməsi və ya işğal edilmiş ərazilərdə qalması şahid ifadələri ilə təsdiq edilib.
Müraciətdə itkin düşənlərin bir çoxunun işgəncə ilə qətlə yetirilməsi və meyitlərinin 30 il Ermənistanın nəzarəti altında olmuş ərazilərdə aşkar edilmiş kütləvi məzarlıqlarda gizlədilməsi onların erməni silahlıları tərəfindən məhv edilməsinin təkzibedilməz sübutu kimi nəzərə çatdırılır:
– Kütləvi məzarlıqlardan 1-i Kəlbəcər rayonunun Başlıbel kəndində, 3-ü Xocavənd rayonunun Edilli kəndində, 1-i Xocalı rayonunun Fərrux kəndində, 2-si Şuşa rayonunun Daşaltı kəndində, 1-i Şuşa şəhərində, 1-i Ağdam rayonunun Sarıcalı kəndində aşkar edilib. Daha bir neçə kütləvi məzarlığın izinə düşülüb, hazırda həmin istiqamətlərdə araşdırmalara başlanıb. İnsanların kütləvi halda qətl edilərək qeyri-insani qaydada basdırılması və izlərinin itirilməsi, bütün insani dəyərlərə hörmətsizlik, vəhşilikdir.
Müraciət bu sözlərlə bitir: “Sizdən xahiş edirik ki, Ermənistana çağırış edəsiniz ki, itkin düşmüş şəxslərin taleyi barədə məlumatları açıqlasın, kütləvi məzarlıqların yerlərini Azərbaycan tərəfinə təqdim etsin. Sizləri çağırırıq ki, BMT-nin itkin düşmüş şəxslər üzrə xüsusi məruzəçisi institutunun yaradılmasına öz töhfənizi əsirgəməyəsiniz”.
“Xalq qəzeti”