Bu komanda milli futbolumuza qələbə əzmi gətirib
“Biz hamımız “Qarabağ”ın Çempionlar Liqasında “Rakov” səddini keçərək yoluna uğurla davam etməsini, hətta qrup mərhələsinə düşməsini arzulayırdıq. Alınmadı, məyus olduq”. Bu sözləri peşəkar idman mediasına açıqlamasında Azərbaycan Mətbuat Şurasının sədri Rəşad Məcid söyləyib.
Xatırladaq ki, “Qarabağ”ın ötən gün Bakıda Polşa “Rakov”u ilə heç-heçə edərək (1:1; ilk oyun – 2:3) Çempionlar Liqası ilə vidalaşmasından sonra sosial mediadakı müzakirələrdə kəskin ittihamlar, nalayiq ifadələr səslənib. AMŞ sədri sosial şəbəkələrdə “Qarabağ” klubunun rəhbərliyinə, baş məşqçi Qurban Qurbanova və futbolçulara qarşı səslənən fikirlərlə bağlı deyib:
– Məyusluq hamıda var. Amma həm bu dəfə, həm də əvvəlki matçlarda sosial mediada pis bir tendensiyanın daha da genişləndiyinin şahidi oluram. Əlbəttə, sosial media istifadəçilərinin bəzilərinin emosiyalarını başa düşürəm. Bəzilərinin sosial mediada məsuliyyət hisslərinin olmadığı anlaşılandır. Lakin hər halda bir ədalət prinsipi, vicdan, haqqı nahaqqa verməmək məsələsi də var.
Bu baxımdan sosial mediada “Qarabağ”, Qurban Qurbanov ilə bağlı bəzi fikirlər qəbuledilməzdir. Hətta bəzən görürsən ki, media rəhbərləri, daha məsuliyyətli olmalı adamlar da “Qarabağ”ın rəhbərliyi, Qurban Qurbanov, onun futbolçuları ilə bağlı həddən artıq emosional, bəzən də təhqir dolu ifadələr işlədirlər. Bu, insanlarda əlavə məyusluq yaradır. Arzulayardım ki, sosial şəbəkə istifadəçiləri soyuqqanlı olsunlar, ani hisslərini və hirslərini o dəqiqə statusa çevirib yazmasınlar, ədalətli olsunlar.
Rəşad Məcid Ağdam təmsilçisinin həm Azərbaycan futboluna, həm də ölkə siyasətinə böyük töhfələr verdiyini xatırladıb:
– “Qarabağ” komandası Azərbaycan futboluna çox böyük töhfələr verib. Bunu görməmək allahsızlıq, ədalətsizlikdir. “Qarabağ”adək biz stadiona gedib, məyus qayıdırdıq. Qələbənin şirinliyini bizə “Qarabağ” yaşadıb. Azərbaycan futbol azarkeşlərinin kütləvi şəkildə stadionlara cəlb olunması “Qarabağ”ın hesabına olub. Bundan başqa, torpaqlarımız işğal altında olarkən Ağdam komandasının Çempionlar Liqasının qrup mərhələsində Londonun, Madridin, Romanın komandaları ilə bir qrupda oynaması istər-istəməz insan beyninə “Ağdam haradır?”, “Ağdam hansı şəhərdir?” kimi Ağdamın işğal olunması barədə şüuraltı informasiyalar ötürürdü. Bunu başqa bir təbliğatla etmək çətin məsələ idi.
– Rəşad Məcid sonda “Qarabağ”ın yenidən böyük uğurlar qazanacağını və azarkeşləri sevindirəcəyini deyib:
– “Qarabağ” avqustun 10-da yenə oynayacaq. Yenə biz həyəcanla “Qarabağ”ın oyunlarına baxacağıq. İndi heyətdə müəyyən boşluq hiss olunur. Bunu hamıdan çox əlbəttə ki, Qurban Qurbanov görür. Qurban Qurbanov sosial şəbəkə istifadəçilərindən, ona ağıl verənlərdən qat-qat artıq bilir çatışmazlığı. İnanırıq ki, komandanın formalaşması, yeniləşməsi dövrü də rahat keçəcək və “Qarabağ” həmişə olduğu kimi, bizi sevindirəcək.
Qeyd edək ki, “Qarabağ” yoluna Avropa Liqasında davam edəcək. Komanda 3-cü təsnifat mərhələsində Finlandiya HİK-i ilə üz-üzə gələcək. Ağdam təmsilçisi ilk oyununu evdə keçirəcək.
Hazırladı: T.RÜSTƏMLİ,“Xalq qəzeti”