Azərbaycanın Müstəqillik Günü və ümummilli lider Heydər Əliyevin 100 illik yubileyi Los-Ancelesdə təntənəli şəkildə qeyd olunub.
Tədbirdə ABŞ siyasi xadimləri, Dövlət Departamentinin və Los-Anceles Vilayətinin rəsmiləri, müxtəlif xarici ölkələrin baş konsulları, tanınmış elm və mədəniyyət xadimləri, jurnalistlər, Azərbaycan icmasının üzvləri, həmçinin dost türk, yəhudi, Pakistan və digər icmaların rəhbərləri iştirak ediblər.
Azərbaycanın baş konsulu Ramil Qurbanov Azərbaycan tarixində olduqca əlamətdar olan iki hadisə, ilk respublikamızın yaranması, nailiyyətləri və ümummilli lider Heydər Əliyevin müasir Azərbaycanın dövlət quruculuğunda rolu haqqında məlumat verib.
Sonra çıxış edən Los-Anceles Konsulluq Korpusunun duayeni Kosmin Dimitresku (Cosmin Dimitrescu), konsulluq korpusu adından bütün azərbaycanlıları Müstəqillik Günü və ümummilli lider Heydər Əliyevin 100 illik yubileyi münasibətilə təbrik edib.
Tədbirdə, həmçinin Heydər Əliyevinhəyatı ilə bağlı film təqdim edilib və şəkillərdən ibarət sərgi təşkil olunub.