Mayın 31-də Sahibə Qafarovanın sədrliyi ilə Milli Məclisin 2023-cü ilin yaz sessiyasında son iclası keçirildi. Parlamentin sədri iclasda 14 məsələnin müzakirə olunacağını bildirdi. O qeyd etdi ki, gündəliyin birinci məsələsi – birinci oxunuşda müzakirəyə təqdim edilmiş “Azərbaycan Respublikasının 2022-ci il dövlət büdcəsinin icrası haqqında” Qanununun layihəsidir.

Qanun layihəsi barədə İqtisa­di siyasət, sənaye və sahibkarlıq komitəsinin sədri Tahir Mirkişili məlumat verdi. O, qeyd etdi ki, “Azərbaycan Respublikasının 2022-ci il dövlət büdcəsinin ic­rası haqqında” qanun layihəsi və “Azərbaycan Respublikası­nın 2022-ci il dövlət büdcəsinin icrasına dair illik hesabat” “Bü­dcə sistemi haqqında” Qanunla müəyyən edilmiş müddətdə və formada Milli Məclisə təqdim edi­lib. 

Komitə sədri bildirdi ki, 2022-ci ilin dövlət büdcəsi ölkə Prezi­denti İlham Əliyevin müəyyən etdiyi strateji inkişaf prioritetləri, sosial-iqtisadi siyasət və təhlükə­sizlik tədbirləri ilə uzlaşdırılaraq, qlobal iqtisadiyyatda gedən pro­seslərin, regionda baş verən ha­disələrin, müdafiə və təhlükəsiz­lik çağırışlarının, işğaldan azad edilmiş ərazilərdə quruculuq işlərinin icmal və dövlət büdcələ­rinin əsas parametrlərinə ehtimal olunan təsirləri nəzərə alınmaqla icra olunub.

T. Mirkişili diqqətə çatırdı ki, 2022-ci il Azərbaycan Respubli­kasının dövlətçilik və müstəqil­lik tarixində Prezident İlham Əliyevin rəhbərliyi ilə işğal altın­da olan ərazilərin azad edilməsi və işğalçı Ermənistan üzərində qazanılan hərbi-siyasi-iqtisadi Qələbədən sonra işğaldan azad edilmiş ərazilərdə bərpa-qurucu­luq işlərinin geniş vüsət aldığı bir il kimi qalacaq. Məhz bu ildə ilk dəfə Zəngilan rayonunun Ağalı kəndinə sakinlərin köçürülmə­silə Böyük Qayıdışa start verilib, Zəngilan Beynəlxalq Hava Lima­nı açılıb, Laçın şəhəri nəzarəti­mizə keçib, Laçın koridorunun marşrutu dəyişdirilib, Qarabağ və Şərqi Zəngəzurda yol, ener­ji, su və digər layihələrin həyata keçirilməsi davam etdirilib. Qeyd edilib ki, bu işlərin aparılması üçün hesabat ilində dövlət büd­cəsindən 4,3 milyard manat və­sait xərclənib.

Komitə sədri dedi ki, Azər­baycanda 2022-ci ildə iqtisadiy­yatın real artımı gözlənilən 3,5 faiz proqnoza qarşı 4,6 faiz olub, ümumi daxili məhsulun həcmi isə ilk dəfə ən yüksək həddə – 133,8 milyard manata çatıb. Qeyri-neft-qaz sektorunda artım 9,3 faiz olaraq 69,8 milyard manat təşkil edib. 2021-ci ilin göstəriciləri ilə müqayisədə artan 40,6 milyard manatlıq ümumi daxili məhsulun 69,5 faizi neft-qaz sektorunun, 30,5 faizi isə qeyri-neft-qaz sek­torunun hesabına formalaşıb. İl ərzində neft-qaz qiymətlərində əvvəlki illə müqayisədə əhəmiy­yətli artımın müşahidə olunması ÜDM-in strukturunda neft-qaz və qeyri-neft-qaz sektorlarının xü­susi çəkilərinin dəyişməsi ilə nə­ticələnib. Belə ki, neft-qaz sek­torunun ÜDM-də payı 47,8 faiz, qeyri-neft-qaz sektorunun payı isə 52,2 faiz təşkil edib. Həmçinin ötən il dünyada müşahidə olu­nan mürəkkəb proseslər fonun­da Azərbaycanda görülən təd­birlər nəticəsində makro-iqtisadi sabitliyə nail olunsa da, 2022-ci ildə orta illik inflyasiya ölkə üzrə 13,9 faiz, ərzaq inflyasiyası isə 19, 5 faiz olub. Hesabat ilində əhalinin nominal gəlirlərinin 20,5 faiz artması inflyasiyanın neqa­tiv təsirlərinin yumşaldılmasına yönəldilib. 

Sonra Hesablama Palatası­nın sədri Vüqar Gülməmmədov “Azərbaycan Respublikasının 2022-ci il dövlət büdcəsinin ic­rası haqqında” Azərbaycan Res­publikasının Qanun layihəsinə və Azərbaycan Respublikasının 2022-ci il dövlət büdcəsinin ic­rasına dair illik hesabata Hesab­lama Palatasının rəyini təqdim etdi.

Qanun layihəsi ətrafında ge­niş müzakirələr aparıldı. Depu­tatlar öz çıxışlarında bəzi qeyd və təkliflərini səsləndiriblər. Mü­zakirələrin sonunda “Azərbay­can Respublikasının 2022-ci il dövlət büdcəsinin icrası haqqın­da” qanun layihəsi səsə qoyula­raq birinci oxunuşda qəbul edildi.

S.Qafarova növbəti 7 məsələ­nin ikinci oxunuşda olan qanun layihələri olduğunu bildirib. Qeyd edildi ki, qanun layihələrinin məqsədi qanunvericiliyin təkmil­ləşdirilməsidir. 

Gündəlikdəki digər qanun la­yihələri də müzakirələrdən sonra səsə qoyularaq müvafiq qərar qəbul edildi.

Milli Məclisin plenar iclasına yekun vuran parlamentin Səd­ri Sahibə Qafarova qeyd etdib ki, bu gün yaz sessiyasının son iclasıdır. Diqqətə çatdırıldı ki, Konstitusiyanın 88-ci mad­dəsinin II hissəsinə uyğun ola­raq, 83 deputat növbədənkənar sessiyanın çağırılması üçün Milli Məclisin sədrinə müraciət edib. S.Qafarova bildirdi ki, o, bu barədə sərəncam imzalayıb və iyun ayında parlamentin növbə­dənkənar sessiyası olacaq. Son­ra o, ötən sessiyada görülmüş işlər haqqında məlumat verdi və dedi ki, Milli Məclisin 2023-cü ilin yaz sessiyasında 14 iclası keçirilib, 91 qanun qəbul edilib. Başqa sözlə, 1 yeni qanun qəbul olunub, 72 qanunda dəyişiklik edilib, 18 beynəlxalq müqavilə təsdiqlənib.

Qeyd edildi ki, Milli Məclis Konstitusiya ilə nəzərdə tutulan qanunvericilik səlahiyyətlərini tam həcmdə yerinə yetirmişdir. Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən qu­ruculuq işlərinin və islahatların qanunvericilik bazası daha da möhkəmləndirilmiş və təkmilləş­dirilmişdir.

Çıxışının sonunda parlamen­tin sədri Milli Məclisin 2023-ci il yaz sessiyasını bağlı elan edib və Azərbaycan Respublikasının Dövlət Himni səsləndirilib.

Bununla da Milli Məclisin 2023-ci il yaz sessiyasının so­nuncu plenar iclası başa çatdı.

B. ƏLİQİSMƏT,

“Xalq qəzeti”