Ukraynada Rusiyanın xüsusi hərbi əməliyyatı bütün şiddəti ilə davam edir. Ukrayna Daxili İşlər Nazirliyinin yaydığı məlumata görə, dünən səhər saatlarında Rusiya ordusu Çerkask vilayətinin Uman şəhərinə kütləvi raket zərbələri endirib. Çoxmərtəbəli yaşayış binasına düşən raket azı 23 nəfərin həlak olmasına, 17 nəfərin yaralanmasına səbəb olub. Gün ərzində dağıntılar altında qalanların çıxarılması üzrə axtarış-xilasetmə işləri davam etdirilib. Faciə ilə əlaqədar Umanda üç günlük matəm elan olunub.
“Euronews” bildirib ki, Dnepr şəhəri də raket zərbəsinə məruz qalıb. Nəticədə, bir qadın və 3 yaşlı uşaq həlak olub. Vilayət administrasiyasından verilən məlumata görə, 3 nəfər yaralanıb.
Son məlumatlara əsasən, aprelin 28-də paytaxt Kiyevə də kütləvi raket zərbələri endirilib. Şəhər administrasiyası bəyan edib ki, Dnepr səmasında rəqibin 11 raketi məhv edilib: “Dəqiqləşdirilmiş məlumata görə, atəşlər strateji aviasiya təyyarələrindən endirilib. Şəhərin hava məkanında 11 qanadlı raket məhv edilib. Bundan əlavə, iki ədəd PUA da vurulub. Təyyarə qırıntılarının Obolonsk rayonuna düşməsi nəticəsində yerli elektrik şəbəkəsi və avtomobil yolu zərər çəkib”.
Ukrayna Prezidenti Volodimir Zelenski özünün teleqram kanalında ölkə ərazisinə kütləvi hücumla bağlı kadrlar yerləşdirib və bəyan edib: “Aprelin 28-də səhər saatlarında Rusiya Ukrayna ərazisinə raket və PUA-larla hücum edib. Hədəf yenə də dinc əhali olub. Raket zərbələri nəticəsində 10 çoxmənzilli bina zədələnib. Binalardan birində bütöv bir dalan məhv edilib. Dağıntılar altında insanlar qalıb. Təəssüf ki, ölən və yaralananlar var, aralarında 10 yaşlı bir uşaq da olub”.
Zelenski əlavə edib ki, Dneprin atəşə tutulması nəticəsində də bir uşaq həlak olub. O, həlak olanların ailələrinə başsağlığı verib.
Baxmut uğrunda döyüşlər də davam edib. Şərq qoşun qruplaşmasının spikeri Sergey Çerevatıy bildirib ki, uzun müddət davam etmiş döyüşlər nəticəsində şəhər faktiki olaraq yaşamaq üçün yararsız vəziyyətə düşüb. Hətta Baxmutu “ikinci Stalinqrad” adlandırırlar. Hələ ki, ukraynalı döyüşçülər şəhəri əldə saxlaya bilirlər. Amma “Vaqner” də şəhəri ələ keçirmək üçün inadla mübarizə aparır.
Ukraynanın müdafiə naziri Aleksey Reznikov isə dünən keçirdiyi mətbuat konfransında bəyan edib ki, ölkənin Silahlı Qüvvələrinin əks-hücuma hazırlığı finiş mərhələsindədir. Onun sözlərinə görə, Ukrayna artıq çoxlu müasir texnika, çoxlu sayda müxtəlif tipli zirehli maşın, məsələn, “Bredley”, “Marder”, “Stryker” alıb: “Bundan əlavə, İsveçdən CV-90 alınacaq. Hazırda qoşunlar komandanlığın hücum qərarını və hücuma imkan verəcək havanı gözləyir”.
Ukrayna Silahlı Qüvvələrinin Baş Qərargahı Zaporojye vilayətinin işğal altında olan Melitopol şəhərində rus hərbçiləri arasında kütləvi zəhərlənmə baş verdiyi barədə məlumat yayıb. Məlumata görə, aprelin 24-də Melitopoldakı rus ordusunun bölmələrinin birində baş verən zəhərlənmə nəticəsində 20 RF hərbçisi ölüb.
Dünən, eyni zamanda, Ukraynaya yaxından dəstək verən Çexiya və Slovakiya prezidentləri Petr Pavel və Zuzana Çaputova Kiyevə gəliblər. Dövlət başçıları Ukrayna lideri Volodimir Zelenski, eləcə də hökumət rəsmiləri ilə görüşüb, danışıq aparıblar. Təhlükəsizlik məqsədilə səfər barədə əvvəlcədən məlumat verilməyib.
Rusiyanın müdafiə naziri Sergey Şoyqu isə bildirib ki, Şimali Atlantika alyansının üzvü olan bütün ölkələrin hərbi potensialı və imkanları Ukraynada xüsusi hərbi əməliyyatların başlanması ilə Rusiyanın əleyhinə cəlb edilib.
“Qərb Rusiya Federasiyası əleyhinə mübarizəyə əvvəlcədən hazırlaşdığını nümayiş etdirib. Dərhal Rusiyaya qarşı genişmiqyaslı sanksiyalar tətbiq edilib, Ukraynaya silahlar, kəşfiyyat məlumatları təşkil olunub, hərbi əməliyyat zonasına hərbi məsləhətçilər və muzdlular göndərilib”, - deyə Şoyqu Nyu-Dehlidə Şanxay Əməkdaşlıq Təşkilatına üzv ölkələrin xarici işlər nazirlərinin iclasında bildirib.
Şoyqu onu da deyib ki, Ukrayna münaqişəsi Vaşinqton və müttəfiqlərinin digər ölkələri də Moskva və Pekin əleyhinə təxribatlara cəlb etdiyini təsdiqləyir.
Paşa ƏMİRCANOV, “Xalq qəzeti”