Süni intellektin sürətli inkişafı incəsənət və fotoqrafiya sahəsində də əks-səda verib. Belə ki, alman rəssam Boris Eldaqsenin süni intellektlə hazırladığı şəkil “Sony World Photography Awards” mükafatını qazanıb. Bu barədə “bbc.com” saytı məlumat yayıb.

B.Eldaqsen müsabiqəyə süni in­tellektin hazırladığı “The Electrician” adlı fotoşəkillə qatılıb. Şəkildə XX əsrin əvvəllərindəki “ruh fotoqrafiyasını” xa­tırladan iki qadın təsvir edilib. Bu şəkil Ümumdünya Fotoqrafiya Təşkilatı tərə­findən təşkil edilən yarışın qaliblərin­dən biri olub. Lakin fotonun yaradıcısı mükafatı qəbul etməyib. 

Alman rəssam yarışma haqqında deyib: “Əsərimi seçdikləri üçün münsif­lər heyətinə təşəkkür edirəm. Məqsə­dim fotoqrafiyanın gələcəyi ilə bağlı müzakirə mühiti yaratmaq idi. Rəsmin süni intellekt tərəfindən hazırlandığını heç kəs başa düşmədi. Hazırda bu cür faktları aşkar etmək üçün inkişaf etmiş sistem də yoxdur. Bununla belə, bir çox şirkətlər bu məsələ üzərində işləyir və ən azından müsabiqələr fonunda bən­zər problemlərin aradan qaldırılaca­ğına ümid edirəm. Belə yarışmalarda süni intellektlə əsl fotoqraflar bir-biri ilə rəqabət aparmamalıdır. Süni intellekt fotoqrafiya deyil. Ona görə də mükafat­dan imtina edirəm”.

Əfsanə ƏHƏDLİ, “Xalq qəzeti”