“Ədalət və İnkişaf Partiyasının seçki kampaniyası əvvəlki illərdə keçirilən ənənəvi kampaniyalardan fərqli olacaq. Çünki Türkiyədə baş verən güclü zəlzələ ilə əlaqədar ölkəmiz hüzün, kədər içindədir. Hörmətli prezidentimiz Rəcəb Tayyib Ərdoğanın da göstərişi ilə əsrin fəlakəti olan bu zəlzələdə həyatını itirənlərin xatirəsinə ehtiram əlaməti olaraq AK Partiyanın seçki kampaniyası musiqisiz, səs-küysüz və sakit bir şəkildə aparılacaq”.
Bu fikirləri Türkiyə–Azərbaycan Parlamentlərarası Dostluq Qrupunun rəhbəri, Türkiyənin hakim Ədalət və İnkişaf Partiyasının (AK Partiya) İstanbul millət vəkili Şamil Ayrım “Xalq qəzeti”nə açıqlamasında bildirdi.
Hazırda Türkiyə Böyük Millət Məclisində (TBMM) 28 dönəm millət vəkilləri siyahısında olmaq üçün öz namizədliyini də irəli sürən Şamil Ayrım dedi ki, prezident və parlament seçkiləri kampaniyasına artıq start verilsə də, AK Partiyanın budəfəki prezident və parlament seçkisi kampaniyasında seçicilərlə daha çox üz-üzə görüş formatına üstünlük verilir: “Prezidentliyə namizədlərin siyahısı martın 31-də dərc olundu və aprelin 1-də Türkiyədə prezidentliyə namizədlərin seçim kampaniyası mərhələsinə başlandı.
Parlament seçkiləri üçün isə AK Partiya aprelin 9-11-də namizədləri müəyyənləşəcək. Aprelin 15-də seçim kampaniyasına başlanır. Mayın 14-də isə prezident və parlament seçkiləri keçiriləcək. Bayraqlı, təntənəli, işıqlı mitinqlərin yerini daha çox üzbəüz görüşlər və ziyarətlər tutacaq. Biz AK Partiya olarak sahədə və ya qapı-qapı gəzərək insanlarla kampaniya aparmağın daha doğru olduğunu düşünürük”.
Təmsil etdiyi partiyanın seçki reytinqinə toxunan millət vəkili ictimai sorğularda AK Partiyanın yüksək mövqedə bərqərar olduğunu və düzgün seçim kampaniyası ilə reytinqlərinin hər zamanki kimi daha da yüksələcəyini diqqətə çatdırıb.
Xatırladaq ki, 2018-ci il iyunun 24-də keçirilən seçkiləri 52,6 faiz səslə Rəcəb Tayyib Ərdoğan qazanmışdı.
M.SULTANOVA
Ankara