Günəşdə baş verən partlayışlar nəticəsində meydana gələn fırtınalar Yer kürəsinə mənfi təsir göstərir. NASA alimləri bu fırtınaları əvvəlcədən aşkar etmək üçün süni intellektdən istifadə edəcəyini açıqlayıb. Məlumatı “foxnews.com” saytı verib.
NASA tərəfindən hazırlanan yeni model “Dagger” (Deep Learning Geomagnetic Perturbation) adlanır. Onun vasitəsilə Günəş fırtınasının Yer kürəsini harada vuracağını 30 dəqiqə öncədən proqnozlaşdırmaq mümkündür. Alimlərin fikrincə, fırtınalara hazırlaşmaq və elektrik şəbəkələrinə, kritik infrastrukturlara ciddi təsirlərin qarşısını almaq üçün bu müddət kifayət edir.
Həmçinin bu yeni süni intellekt modeli Günəşdə baş vermiş iki geomaqnit qasırğa zamanı sınaqdan keçirilib. Hər iki halda “Dagger” fırtınanın dünyaya təsirini tez və dəqiq proqnozlaşdırıb. Qeyd edək ki, bu modeldən digər kosmik şirkətlərin də istifadə edə biləcəyi açıqlanıb.
Əfsanə ƏHƏDLİ, “Xalq qəzeti”