Bu ilin birinci yarısında Mingəçevir Sənaye Parkında 24,9 milyon manatlıq məhsul istehsal olunub. Bu da ötən ilin eyni dövrü ilə müqayisədə, təqribən, 7 faiz çoxdur.
İqtisadiyyat Nazirliyi yanında İqtisadi Zonaların İnkişafı Agentliyindən XQ-yə bildirilib ki, hesabat dövründə parkda istehsal olunmuş malların 16,7 milyon manatlıq hissəsi isə ixraca yönəldilib. Ümumilikdə, Mingəçevir Sənaye Parkında indiyədək 351,4 milyon manatlıq məhsul satışı həyata keçirilib. Bunun 293,3 milyon manatlıq hissəsi və ya 83 faizindən çoxu ixracın payına düşür.
Ötən müddətdə sənaye parkında investisiya portfeli 530,3 milyon manat olan 2 sahibkarlıq subyektinə rezidentlik statusu verilib. Hazırda burada 1 müəssisə fəaliyyət göstərir. Görülən işlərə isə, ümumilikdə, 159 milyon manat investisiya yatırılıb. Bunun da hesabına 550 nəfər daimi işlə təmin edilib.
Xatırladaq ki, Mingəçevir Sənaye Parkı ölkə Prezidenti İlham Əliyevin 2015-ci il 26 fevral tarixli fərmanı ilə yaradılıb. Parkın əsas fəaliyyət istiqaməti toxuculuq və yüngül sənayenin inkişaf etdirilməsidir.
