Energetika naziri Pərviz Şahbazov Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclasında iştirak məqsədilə Bakıda səfərdə olan Dünya Bankının Cənubi Qafqaz üzrə regional direktoru, xanım Roland Praysın rəhbərlik etdiyi nümayəndə heyəti ilə görüşüb. Bu barədə “XQ”yə Energetika Nazirliyindən məlumat verilib.
Bildirilib ki, görüşdə Dünya Bankı ilə enerji sahəsində əməkdaşlığın hazırkı səviyyəsindən məmnunluq ifadə edilib. Bank tərəfindən Azərbaycanda ötürücü şəbəkənin gücləndirilməsi (AZURE) layihəsinə 173,5 milyon ABŞ dolları məbləğində kreditin ayrılması bərpaolunan enerji mənbələrinin şəbəkəyə inteqrasiyasına töhfə olaraq dəyərləndirilib. Qeyd olunub ki, ölkənin enerji sisteminə 2027-ci ilə qədər 2 qiqavatdan çox, növbəti mərhələdə isə, təxminən, 700 meqavat “yaşıl” enerji güclərinin inteqrasiyası planlaşdırılır.
Müzakirələr zamanı şəbəkənin gücləndirilməsi və bərpaolunan enerjinin tədarük layihələri üzrə əməkdaşlığa dair məsələlər nəzərdən keçirilib. Azərbaycandan və Mərkəzi Asiyadan Avropaya müxtəlif interkonnektorlarla enerji ixracı üzrə hazırda reallaşdırılan təşəbbüslərin icra vəziyyətindən bəhs edilib. Bu layihələrin Avropanın enerji təhlükəsizliyinin təminatında gələcək rolu vurğulanıb.
Görüşdə, həmçinin Beynəlxalq Maliyyə Korporasiyası ilə dənizdə külək enerjisindən istifadə sahəsində əməkdaşlıq çərçivəsində hazırlanan Yol Xəritəsindən söhbət açılıb və hazırda enerji şirkətləri ilə həyata keçirilən tədbirlərdən danışılıb.
Söhbət zamanı Dünya Bankı ilə nasoslu hidroenerji anbarları və digər perspektiv layihələr üzrə əməkdaşlıq imkanlarına dair fikir mübadiləsi də aparılıb.
