2024-cü ildə Azərbaycanda gündəlik neft hasilatı orta hesabla 481 min barel təşkil edib ki, bu da əvvəlki ilin göstəricisi (503 min barel) ilə müqayisədə 22 min barel azdır. Bu barədə məlumat Neft İxrac Edən Ölkələr Təşkilatının (OPEC) aylıq hesabatında yer alıb. 
Hesabata əsasən, ötən ilin dekabr ayında ölkədə gündəlik neft hasilatı orta hesabla 485 min barel səviyyəsində olub. Bu isə noyabr ayının göstəricisi ilə müqayisədə 2 min barel azdır. Sənəddə bildirilir ki, 2024-cü ilin üçüncü və dördüncü rüblərində Azərbaycanda ortalama gündəlik neft hasilatı 486 min barel, ikinci rübdə 475 min barel, birinci rübdə isə 477 min barel təşkil edib.
Xatırladaq ki, “OPEC plyus” (OPEC və təşkilata daxil olmayan ölkələri əhatə edən neft istehsalının azaltması üzrə təşəbbüs) ölkələri nazirlərinin 38-ci iclasında əldə edilmiş razılaşmaya görə, 2026-cı ilin sonunadək Azərbaycanın hasilat kvotası gündəlik 551 min barel təşkil edir. Beləliklə, ölkəmiz 2024-cü ilin dekabr ayında “OPEC plyus” çərçivəsində kvotadan 66 min barel geridə qalıb.