“İcbari Sığorta Bürosu” Hüquqi Şəxslərin İttifaqı (İSB) Böyük Britaniyada keçirilmiş “Global Insurtech Awards” Mükafatlandırma Proqramında 3 kateqoriya üzrə təltifə layiq görülüb. Qurum bu mükafata fəaliyyətində innovativ texnologiyaların tətbiqinə xüsusi yer ayırdığına, IT layihələri, innovativ yanaşmalar və müştəri məmnuniyyətinə verdiyi töhfələr sayəsində nail olub.
Müştərilərlə əlaqələrin effektiv idarə olunması və onlara təqdim edilən xidmətlərin keyfiyyətinin artırılması nominasiyasında İSB-nin informasiya sistemi birincilik əldə edərək “Best Customer Engagement Software” mükafatına layiq görülüb. “Best Embedded Insurance Provider” mükafatı üzrə ikincilik İSB-nin inteqrasiya olunmuş sığorta mexanizminin sektor üzrə yaratdığı yeniliklər və yüksək effektivlik nəzərə alınaraq verilib. Daha bir nominasiya – “Insurtech of the Year” mükafatı üzrə ikincilik qurumun yeni texnologiya və proseslərin inkişafına verdiyi töhfələrə görə təqdim olunub.
Qeyd edək ki, “Global Insurtech Awards” – dünya üzrə “insurtech” (sığorta texnologiyaları) sahəsində qabaqcıl yenilikləri və texnoloji həlləri tanıtmaq məqsədilə keçirilən mükafatlandırma proqramıdır. Hər il Böyük Britaniyada keçirilən proqram çərçivəsində sığorta sahəsində innovativ həllərə imza atan qurumların (bürolar, şirkətlər, startaplar) texnoloji nailiyyətləri qiymətləndirilir. İSB-nin bu proqram çərçivəsində qazandığı uğurlar Azərbaycanın sığorta sisteminin beynəlxalq səviyyədə tanınmasına, ölkəmizin sığorta sektorundakı texnoloji yeniliklərinin dünya miqyasında təbliğinə töhfələr verəcək.
