Tacikistanın mobil operatoru “Azerspace-2” peykindən istifadə edəcək. Bununla bağlı Azərbaycanın Rəqəmsal İnkişaf və Nəqliyyat Nazirliyi yanında Kosmik Agentlik (“Azərkosmos”) Tacikistanın “ZET Mobile” mobil operatoru ilə əməkdaşlıq müqaviləsi imzalayıb.
“Azərkosmos”dan verilən məlumata görə, “ZET Mobile” “Azerspace-2” peykindən istifadə etməklə Tacikistanın uzaq regionlarında yüksək keyfiyyətli rabitə xidmətlərinin təmin olunmasını təşkil edəcək. Bildirilib ki, Tacikistanda rabitə xidmətlərinə çıxış əksər hallarda iri şəhərlərlə məhdudlaşır. “Azərkosmos”la əməkdaşlıq isə bu ölkənin həm rəqəmsal infrastrukturuna, həm də ucqar bölgələrdə sosial-iqtisadi inkişafa töhfə verəcək.
Eyni zamanda, “ZET Mobile” mobil operatoru “Azerspace-2” peykinin xidmətlərindən istifadə etməklə müştərilərinə nəqliyyat vasitələrində, dövlət və özəl qurumlarda, eləcə də ucqar ərazilərdə rabitə və internet xidmətlərindən faydalanmaq imkanı yaradacaq.
