“AzərGold” Qapalı Səhmdar Cəmiyyətinin təşkilatçılığı və Kənd Təsərrüfatı Nazirliyinin dəstəyi ilə “Daşkəsən rayonunda kartofçuluq təsərrüfatının inkişafına dəstək” layihəsinin icrası uğurla başa çatdırılıb.
Bu münasibətlə rayonda yerləşən Çovdar İnteqrəolunmuş Regional Emal Sahəsində layihədə iştirak etmiş kartofçuluq təsərrüfatı sahiblərinin təltifolunma mərasimi keçirilib. Tədbirdə “AzərGold” QSC, Kənd Təsərrüfatı və İqtisadiyyat nazirlikləri, Daşkəsən Rayon İcra Hakimiyyəti, Tərəvəzçilik Elmi- Tədqiqat İnstitutunun nümayəndələri, eləcə də layihəyə cəlb edilmiş mütəxəssis və kartofçu fermerlər iştirak ediblər.
Mərasimdə layihənin “AzərGold” QSC tərəfindən korporativ sosial məsuliyyət fəaliyyəti çərçivəsində Daşkəsəndə ənənəvi kənd təsərrüfatı sahələrindən hesab olunan kartofçuluğun inkişaf etdirilməsi, sahibkarlıq növü kimi təşviqi və dəmyə üsulu ilə kartof istehsalının artırılmasına töhfə vermək məqsədilə həyata keçirildiyi bildirilib. Layihəyə “Elektron Kənd Təsərrüfatı İnformasiya Sistemi”ndə qeydiyyatda olan, əkinə yararlı minimum 1 hektar torpaq sahəsinə malik Quşçu və Zəylik kənd fermerlərinin cəlb edildiyi diqqətə çatdırılıb.
Layihə çərçivəsində fermerlərə Tərəvəzçilik Elmi-Tədqiqat İnstitutunun mütəxəssisləri tərəfindən nəzəri və praktiki təlimlərin keçirildiyi, həmçinin 10 hektar sahəyə yerli iqlim şəraitinə uyğun “Telman”, “Əmiri 600” toxumlarının səpildiyi, müvafiq aqro-texniki qulluğun göstərildiyi bildirilib. Qeyd olunub ki, mövsüm ərzində havanın qeyri-sabit keçməsinə baxmayaraq, təsərrüfatlardan 100 tona yaxın məhsul yığılıb. Layihə çərçivəsində yığılmış məhsulun 85 faizi fermerlərə ayrılıb. Məhsulun 15 faizi isə Daşkəsən rayonunda yaşayan aztəminatlı ailələr arasında bölüşdürülüb.
Diqqətə çatdırılıb ki, strateji məhsullardan sayılan kartof istehsalının artırılması üçün əkin sahələrinin genişləndirilməsi, təsərrüfatların inkişaf etdirilməsi dövlət səviyyəsində daim diqqətdə saxlanılır. Kartofçuluq rayonlarında belə stimullaşdırıcı layihələrin icrasının ümumi işə əlavə töhfələr verdiyi vurğulanıb.
Sonda təlim və praktiki məşğələləri uğurla tamamlayan kartofçu fermerlər sertifikatlarla təltif ediliblər.
