Bakı Enerji Həftəsi çərçivəsində energetika naziri Pərviz Şahbazovla Azərbaycanda səfərdə olan Türkiyənin energetika və təbii sərvətlər naziri Alparslan Bayraktarın rəhbərlik etdiyi nümayəndə heyəti arasında görüş olub.

Görüşdə Azərbaycan–Türkiyə qar­daşlığı və strateji müttəfiqliyinin enerji əməkdaşlığını möhkəmləndirən töhfələ­rindən məmnunluq ifadə edilib. Hər iki ölkə liderlərinin Azərbaycan–Türkiyə enerji əməkdaşlığına böyük önəm verdi­yi vurğulanıb. Neft-qaz sahəsində birgə həyata keçirilən enerji layihələrinin regi­on və Avropa ölkələrinin enerji təhlükə­sizliyinin təminatındakı rolundan ətraflı danışılıb. 

Çoxşaxəli enerji tərəfdaşlığının yeni mərhələdə inkişafını təmin edən təbii qaz və “yaşıl enerji” sahələrindəki pri­oritetlər və gündəlikdə olan layihələr nəzərdən keçirilib. Bildirilib ki, İğdır–Naxçıvan qaz kəmərinin inşası tezliklə yekunlaşacaq və ilin sonunadək Naxçı­van Türkiyə üzərindən qazla təchiz olu­nacaq. Hazırda Azərbaycan və Türkiyə arasında təbii qaz sahəsində çoxşaxəli əməkdaşlıq gündəliyinin olduğu, mü­vafiq hökumətlərarası sazişlə Azərbay­candan və üçüncü ölkələrdən Türkiyə və Avropaya qaz tədarükünə imkanlar yarandığı bildirilib.