Dünən Azərbaycan Dövlət Su Eh­tiyatları Agentliyi (ADSEA) ilə BP arasında icmalarda su təchizatı ilə əlaqədar vəziyyəti yaxşılaşdır­mağa kömək edəcək potensial su layihələrinin müəyyən edilməsi, seçilməsi və həyata keçirilməsi istiqamətində birgə işləmək üçün əməkdaşlıq müqaviləsi imzalanıb. Bu barədə “XQ”-yə “BP-Azərbaycan” şirkətindən məlumat verilib. 

Bildirilib ki, icmalarda su təchizatı ilə əlaqədar vəziyyəti yaxşılaşdırmağı nəzərdə tutan əməkdaşlıq çərçivəsində ilkin olaraq üç potensial layihənin reallaş­dırılması nəzərdə tutulur. Göyçay rayo­nunda yeni su təchizatı sisteminin yara­dılması ilə bağlı birinci layihədə məqsəd sel sularının toplanması, çökdürülməsi və təmizlənməsindən ibarətdir. Layihə çərçivəsində təmizlənmiş sudan torpaq­ların suvarılması üçün istifadə ediləcək. Yeni su təchizatı sisteminin ildə 500 min kubmetrdən çox su təmizləmə gücündə olacağı nəzərdə tutulur. Bu isə rayon əra­zisində 100 hektara qədər ərazini suvar­mağa imkan verəcək.

İkinci layihə Tovuz rayonunda iki ye­raltı su təchizatı mənbəyinin – kəhrizin bərpa edilməsi məqsədini daşıyır. Bərpa edildikdən sonra bu iki kəhrizdən il ərzin­də 2,5 milyon kubmetrə qədər şirin su əldə ediləcək. Bu da öz növbəsində 15 min nəfərə yaxın icma üzvünün məişət istehlakı və torpaqların suvarılması ilə əlaqədar ehtiyaclarını təmin etməyə im­kan yaradacaq. 

Digər bir layihə isə Kürdəmir, Ucar, Ağdaş, Yevlax, Goranboy və Samux ra­yonlarını əhatə edəcək. Layihə çərçivə­sində adı çəkilən rayonlarda içməli su, suvarma və sanitariya təyinatlı 25 su sistemi yaradılacaq. Bundan da 20-yə yaxın kəndin 25 min nəfər sakini fayda­lanacaq. 

İmzalanma mərasimində ADSEA sədrinin müşaviri Əsəd Şirinov deyib ki, ölkəmizdə həyata keçirilən “yaşıl” siyasə­tin əsas hədəflərindən biri də dayanıqlı su ehtiyatlarının formalaşdırılması və sudan səmərəli istifadənin təmin edilmə­sidir. Prezident İlham Əliyevin tapşırıqla­rına uyğun olaraq hazırda bu sahədə ge­nişmiqyaslı layihələrin həyata keçirildiyini diqqətə çatdıran qurum rəsmisi bildirib ki, Azərbaycan beynəlxalq aləmdə iqlim də­yişikliklərinin fəsadlarına qarşı mübarizə­də etibarlı və məsuliyyətli tərəfdaş kimi qəbul edilir. Onun sözlərinə görə, eko­sistemin bərpası, ətraf mühitin sağlam­laşdırılması, su ehtiyatlarından səmərəli istifadənin təmin edilməsi istiqamətində həyata keçirilən tədbirlər Azərbaycanın “yaşıl” gələcəyə doğru addımlar atması­nın göstəricisidir.

BP-nin Xəzər regionu üzrə vitse-pre­zidenti Bəxtiyar Aslanbəyli deyib: “Şirin su çatışmazlığı problemi ilə üzləşən kənd icmalarına kömək etmək istiqamətində Dövlət Su Ehtiyatları Agentliyi ilə səylə­rimizi bir araya gətirməkdən məmnunuq. Diqqətimizi xüsusilə kifayət qədər şirin suyun olmadığı və ya təhlükəsiz su təc­hizatı mənbələrinin əlçatan olmadığı əra­zilərə yönəldəcəyik. Ümid edirik ki, əmək­daşlığımız və birgə layihələrimiz minlərlə insanın məişət, sağlamlıq və sanitariya, eləcə də kənd təsərrüfatı istehlakı üçün suya olan tələbatını təmin etməyə kömək edəcək”.

Xatırladaq ki, iki il müddətinə nəzər­də tutulmuş layihələrin ümumi dəyəri 2,6 milyon ABŞ dollarından artıqdır.

Yeri gəlmişkən, BP şirkəti Azərbay­canda fəaliyyət göstərdiyi ötən 32 il ər­zində neft və qazın kəşfiyyatı, işlənməsi və nəqli üzrə iri layihələrin əməliyyatçısı kimi çıxış edib. Şirkət bu layihələrin icra­sını təhlükəsiz, səmərəli və etibarlı şəkil­də həyata keçirib. Ötən müdddətdə BP öz tərəfdaşları ilə birlikdə ölkədə icraçısı olduğu layihələrə, təxminən, 84 milyard dollar sərmayə yönəldib. Şirkət Azər­baycanda ən çox töhfə verə biləcəyinə inandığı sahələrə sərmayə yönəlməklə dayanıqlı inkişaf təşəbbüslərinə dəstək vermək öhdəliyini götürüb. 

Britaniya nəhənginin ölkəmizdə həya­ta keçirdiyi geniş sosial sərmayə fəaliy­yətləri və bacarıqların inkişaf etdirilməsi istiqamətindəki səyləri insanlara əhəmiy­yətli faydalar gətirməklə onların həyatını əhəmiyyətli dərəcədə yaxşılaşdırmağa mühüm töhfələr verib. Belə ki, şirkətin so­sial sərmayələri yerli potensialın yaradıl­ması, təhsil, icmaların inkişafı, yerli sahi­bkarlıq, ətraf mühit, idman potensialının artırılması, habelə ölkənin zəngin mədə­ni irsinin tədqiqi və təbliği kimi sahələrə yönəlib. Fəaliyyətə başladığı vaxtdan indiyədək BP şirkəti və onun əməliyyat­çısı olduğu birgə layihələrdəki tərəfdaş­ları adından ölkədəki sosial sərmayə la­yihələrinə, ümumilikdə, 110 milyon ABŞ dollarından çox vəsait xərcləyib. 

Qeyd edək ki, “BP-Azərbaycan” şirkətində təxminən 2353 yerli vətəndaş çalışır ki, bu da qurumun ixtisaslı işçi heyətinin 90 faizindən çoxunu təşkil edir.

Mirbağır YAQUBZADƏ
XQ