Beynəlxalq Bərpa Olunan Enerji Agentliyi (IRENA) Assambleyasının “COP28-in yekunları: infrastruktur, strategiya və bərpa olunan enerjidən istifadəni üç dəfə artırmaq və enerji keçidini sürətləndirmək bacarıqları” mövzusunda keçirilən 14-cü sessiyası çərçivəsində “Afrikada bərpa olunan enerji mənbələrinin tətbiqinin sürətləndirilməsi” mövzusunda iclas keçirilib.
AZƏRTAC-ın BƏƏ paytaxtına ezam olunmuş müxbiri xəbər verir ki, iclasda keçən il COP28 çərçivəsində start verilən Afrikada Bərpa Olunan Enerji Mənbələri üzrə Aktiv Tərəfdaşlığın (APRA) həyata keçirilməsi məsələləri müzakirə edilib.
IRENA Assambleyasının 14-cü sessiyasının sədri, Ruandanın infrastruktur naziri Cimmi Qasorun moderatorluğu ilə keçirilən iclasın əvvəlində IRENA-nın baş direktoru Françesko La Kamera, eləcə də BƏƏ-nin xarici işlər üzrə dövləti naziri Şeyx Şahbut Əl Nəhyan çıxış ediblər.
Zimbabvenin energetika və enerji inkişafı naziri Edqar Moyo APRA üzvlüyünə ayrı-ayrı ölkələr üçün bir format şəklində deyil, Afrika qitəsi ölkələrinin kollektiv səylərinin əks olunması vasitəsi kimi baxmağa çağırıb.
Öz növbəsində, Qananın energetika naziri Herbert Krapa enerji keçidini təmin etmək üçün elektrik şəbəkəsi infrastrukturuna sərmayə qoyuluşunun vacibliyini qeyd edib.
Müzakirələrdə, həmçinin Afrika İttifaqının infrastruktur və enerji üzrə komissarı Amani Əbu-Zaid və Namibiyanın mədən və energetika nazirinin müavini Korneliya Şilunqa iştirak ediblər.
Tədbir geniş diskussiyalarla davam edib.
