Bakıda keçirilən “Vergi sistemi yeni inkişaf dövründə: davamlı iqtisadiyyat üçün strateji hədəflər” adlı forumda İqtisadiyyat Nazirliyinin şöbə müdiri Hüseyn Hüseynov bildirib ki, “2022–2026-cı illərdə sosial-iqtisadi inkişaf Strategiyası”na əsasən, orta müddətli dövrdə Azərbaycanda iqtisadi artımın 3-4 faiz ətrafında saxlanılması qarşıya mühüm vəzifə kimi qoyulub. Bununla bağlı ekoloji sahəyə, xüsusilə “yaşıl enerji”yə investisiyaların artırılması istiqamətində məqsədlər müəyyənləşdirilib.
Beləliklə, 2026-cı ilə qədər ümumi qoyuluş gücündə bərpaolunan enerjinin payının 17 faizdən 24 faizə çatdırılması hədəf götürülüb. 2030-cu ildə bu hədəfin 30 faizə çatdırılması sosial-iqtisadi inkişaf strategiyasının başlıca prioritetlərindən biridir. Göründüyü kimi, “yaşıl artım” və “yaşıl iqtisadiyyat” istiqamətində strateji sənəd və hədəflər müəyyənləşdirilib. Amma burada əsas məsələlərdən biri məhz nəzərdə tutulan məqsədlərin reallığa çevrilməsini sürətləndirməkdir. Bu, COP-29 prosesi ilə bağlı fəaliyyət planının icrasında diqqət mərkəzində saxlanılacaq.
XQ