Yeni müəssisələrdə 11 milyard manatdan çox məhsul buraxılıb
Azərbaycanda fəaliyyət göstrən sənaye zonalarında indiyə qədər, ümumilikdə, 11,1 milyard manatlıq məhsul istehsal edilib ki, bunun da 3,6 milyard manatlıq hissəsi ixrac olunub. Ötən müddətdə ölkəmizdəki sənaye zonalarında investisiya layihələrinin dəyəri 7 milyard manatdan çox olan 138 sahibkarlıq subyektinə rezidentlik statusu verilib.
Bu və digər məsələlər barədə İqtisadiyyat Nazirliyi yanında İqtisadi Zonaların İnkişafı Agentliyinin (İZİA) İdarə Heyətinin sədri Elşad Nuriyev ümummilli lider Heydər Əliyevin və Türkiyə Cümhuriyyətinin 100 illiyinə həsr edilmiş Azərbaycan – Türkiyə İnvestisiya Forumu çərçivəsində keçirilən “Azərbaycan Respublikasında investisiya qoyuluşu imkanları” adlı panel iclasında çıxışı zamanı deyib.
Hazırda ölkəmizdə 7 sənaye parkı (Sumqayıt Kimya, Mingəçevir, Pirallahı, Qaradağ, Ağdam, Balaxanı və "Araz Vadisi İqtisadi Zonası") və 5 sənaye məhəlləsi (Hacıqabul, Neftçala, Masallı, Sabirabad və Şərur) fəaliyyət göstərir. İZİA sədri deyib ki, indiyədək həmin sənaye zonalarına, ümumilikdə, 6,6 milyard manat investisiya yatırılıb. Bunun da hesabına 11 mindən çox daimi iş yeri yaradılıb. Onun sözlərinə görə, növbəti mərhələdə sənaye zonalarına mövcud layihələr üzrə 864 milyon manat investisiyanın yatırılması və 6 min 700-dən çox daimi iş yerinin yaradılması nəzərdə tutulur.
Agentlik sədri deyib ki, bu ilin 9 ayında sənaye zonalarında fəaliyyət göstərən müəssisələr tərəfindən 2,3 milyard manatlıq məhsul satılıb. Bunun da 31 faizindən çoxu, yəni 722 milyon manatdan artıq hissəsi ixracın payına düşüb. Qeyd olunub ki, yanvar–sentyabr aylarında sənaye zonalarının ölkə sənayesinin qeyri-neft sektorunda xüsusi çəkisi 17,9 faiz, qeyri-neft sənaye məhsullarının ixracında isə payı 22,9 faiz təşkil edib. “Bütün deyilənlər bir daha onu göstərir ki, sənaye zonaları qeyri-neft sektorunun inkişafında mühüm rol oynayır, onların məhsulları 60-dan çox ölkəyə ixrac edilib”, – deyə E.Nuriyev əlavə edib. İZİA sədri onu da bildirib ki, növbəti mərhələdə ölkəmizdə fəaliyyət göstərən sənaye zonalarına mövcud layihələr üzrə 864 milyon manat investisiyanın yatırılması, bunun da hesabına 6700-dən çox daimi iş yerinin yaradılmasının nəzərdə tutulur.
İxracdan söhbət düşmüşkən, İZİA-nın idarəçiliyində olan Sumqayıt Kimya Sənaye Parkının bu sahədəki uğurları diqqəti daha çox cəlb edir. Belə ki, adı çəkilən sənaye zonası fəaliyyət göstərdiyi 12 il ərzində 3,3 milyard manatlıq məhsul ixrac edib. Bu barədə Azərbaycanın iqtisadiyyat naziri Mikayıl Cabbarov “X” sosial şəbəkəsindəki hesabında bildirib. Nazir qeyd edib: “Bu gün Prezident İlham Əliyevin sərəncamı ilə təsis edilmiş ölkəmizin ilk sənaye parkı olan Sumqayıt Kimya Sənaye Parkının yaradılmasından 12 il keçir. Bu müddətdə parkın fəaliyyətindən əldə edilən nəticələr iqtisadiyyatımızın diversifikasiyasına, qeyri-neft sektorunun inkişafına, məşğulluğun artırılmasına, innovativ istehsalın təşkilinə və idxaldan asılılığın azaldılmasına əhəmiyyətli töhfələr verib. Bu günə qədər parka 5,8 milyard manata yaxın investisiya qoyulub, buradan 9,5 milyard manat dəyərində satış həyata keçirilib, 6 min 600-dən çox daimi iş yeri yaradılıb”.
Azərbaycanın sənaye parklarında yaradılmış əlverişli biznes mühiti və geniş logistik imkanlar, eləcə də bir sıra stimullaşdırıcı tədbirlər xarici şirkətlərin də marağına səbəb olub. Məhz bunun nəticəsidir ki, ölkəmizin sənaye zonalarında xarici kapitallı rezidentlərin sayı getdikcə artır. Hazırda Sumqayıt Kimya Sənaye Parkında İsveçrə şirkəti olan “Sika” MMC, Çin kapitallı “Azərbaycan Vanhong Ceramics Co.” MMC, Birləşmiş Ərəb Əmirliklərinin “SENSEMI DMCC” şirkəti, Pirallahı Sənaye Parkında Rusiya – Azərbaycan birgə müəssisəsi olan “R-Pharm” MMC, Ağdam Sənaye Parkının rezidenti kimi qeydiyyata alınan Birləşmiş Ərəb Əmirlikləri kapitallı “Expert Services FZE” Məhdud Məsuliyyətli azad zona müəssisəsi, Neftçala Sənaye Məhəlləsində İran – Azərbaycan birgə avtomobil müəssisəsi, Hacıqabul Sənaye Məhəlləsində qeydiyyata alınan “Penoplex Prikavkazye” MMC fəaliyyət göstərir. Bu ilin iyun ayında isə “Araz Vadisi İqtisadi Zonası” Sənaye Parkında Rusiya – Azərbaycan birgə servis mərkəzi olan “Avto Lizinq Azərbaycan” MMC-nin xidmət sahəsi fəaliyyətə başlayıb.
Yeri gəlmişkən, ölkə regionlarının iqtisadi potensialının hərəkətə gətirilməsində, eləcə də məşğulluğun təmin olunmasında sənaye zonaları mühüm rol oynayır. Elə bunun nəticəsidir ki, respublikamızda fəaliyyət göstərən 12 sənaye zonasının 8-i məhz regionların payına düşür. İşğaldan azad edilmiş ərazilərin iqtisadi potensialının hərəkətə gətirilməsi, Qarabağ və Şərq Zəngəzur iqtisadi rayonlarının iqtisadiyatının reinteqrasiyasını təmin etmək məqsədilə yaradılmış “Ağdam” və “Araz Vadisi İqtisadi Zonası” sənaye parkları da bu baxımdan diqqət çəkir. Artıq real fəaliyyət sahələrinə çevrilməkdə olan həmin parklarda, ümumilikdə, 18 rezident və 6 qeyri-rezident qeydiyyata alınıb. Adıçəkilən sənaye parklarında qeydiyyata alınmış 24 layihə üzrə 138 milyon manatdan çox investisiyanın yatırılması nəzərdə tutulur ki, bunun da hesabına 1300-ə yaxın iş yeri yaradılacaq. Ağdam Sənaye Parkında tikinti materiallarının istehsalı, kənd təsərrüfatı məhsullarının emalı və qablaşdırılması, “Araz Vadisi İqtisadi Zonası”nda isə, əsasən, logistika mərkəzinin yaradılması, gömrük terminalının qurulması, avadanlıq və texnikaların təmiri mərkəzi, topdansatış və pərakəndə anbarlarının tikilməsi və satışı həyata keçiriləcək.
Qeyd edək ki, Azərbaycanda sənaye parklarının, sənaye məhəllələrinin və aqroparkların idarə edilməsinin təkmilləşdirilməsi Prezident İlham Əliyevin müvafiq fərmanı ilə yaradılmış İqtisadi Zonaların İnkişafı Agentliyi tərəfindən həyata keçirilir.
Bu arada, İqtisadiyyat Nazirliyi yanında İqtisadi Zonaların İnkişafı Agentliyinin Müşahidə Şurasının növbəti iclası keçirilib. Toplantıda qurumun rəhbəri Elşad Nuriyev 2023-cü ildə sənaye zonaları və aqroparklarda görülmüş işlər və əldə edilmiş nəticələr barədə ətraflı məlumat verib. Şura iclasında, həmçinin 2024-cü il üzrə qarşıya qoyulmuş prioritet inkişaf istiqamətləri, baxılmaqda olan layihələrlə bağlı müzakirələr aparılıb. Agentliyin strukturunun təkmilləşdirilməsi, sənaye zonalarında rezidentlərə xidmət göstərəcək təsərrüfat cəmiyyətinin yaradılması barədə təkliflər təhlil edilib.
Mirbağır YAQUBZADƏ
XQ