Ağstafa rayonunda avqustun 25–26-da “Rusiya–Azərbaycan Tarla Günü – 2023” ixtisaslaşdırılmış sərgisi keçiriləcək. Operatoru “EXPOCENTRE” Səhmdar Cəmiyyəti olan sərgi “Rosspetsmash” Assosiasiyasının fəal dəstəyi ilə qonşu ölkənin Sənaye və Ticarət Nazirliyi tərəfindən təşkil olunacaq.
Rusiyanın aparıcı kənd təsərrüfatı maşınqayırması müəssisələri ikinci dəfədir ki, ən yaxşı texnika və avadanlıqlarını Azərbaycan fermerlərinə göstərmək və sınaqdan keçirmək imkanı yaratmaq məqsədilə Azərbaycana gətirəcək.
“Rusiya–Azərbaycan Tarla Günü” yeni formatda – Kənd Təsərrüfatı Nazirliyi yanında Aqrar İnnovasiyalar Mərkəzinin təşkilatçılığı ilə “AqroİnnoFest” festivalı ilə birgə reallaşacaq. Tədbir Ağstafa aqrar-sənaye kompleksinin ərazisində keçiriləcək.
Sərgini Rusiya ixtisaslaşdırılmış texnika bazarının liderləri olan 14 müəssisə – Rostselmaş, Sankt-Peterburq traktor, Cənubi Ural Tərəzi və Voronej aqromaş zavodları, Peqas-Aqro, Melinvest, ALMAZ, Salskselmaş, Texnostal, Aqromexanika, AqroPostavka müəssisələri təmsil edəcək.
Rusiyanın ixtisaslaşdırılmış texnika sərgisi 800 kvadratmetrdən çox ərazini əhatə edəcək. Onu ziyarət etməklə azərbaycanlı fermerlər, aqrar sektor holdinqləri, kənd təsərrüfatı texnikası üzrə dilerlər qonşu ölkə istehsalı olan taxılyığan kombaynlar, kotanlar, dırmıqlar, çiləyici və səpələyicilər, kultivatorlar, taxıltəmizləyən separatorlar və digər texnikanın həm yeni, həm də artıq tanınan modelləri ilə tanış ola biləcəklər.
Rusiyanın kombaynqayırma sahəsində əvəzsiz lider olan “Rostselmaş” ziyarətçilərə “Power Stream 4m” taxılbiçənli “NOVA 340” kombaynını nümayiş etdirəcək. Bu müəssisənin brendinin məhsulları dünyanın 40-dan çox ölkəsində tanınır və indi Azərbaycanın kənd təsərrüfatı istehsalçıları həmin məhsulları öyrənə və satış qiyməti ilə maraqlana biləcəklər. Stenddə kombaynla yanaşı, bir neçə ildir ki, respublikamızın tarlalarında uğurla fəaliyyət göstərən “Tukan” kipbağlayan presləyici-yığıcı da nümayiş etdiriləcək.
ALMAZ Ticarət evi (“Altay maşınqayırma zavodları” Şirkətlər Qrupunun bir hissəsi) sərgidə özünün bestsellerini – quraşdırılmış reversiv “PERESVET PON-4+1” kotanını nümayiş etdirəcək. Azərbaycan fermerləri ALMAZ stendində kotanla yanaşı, kənd təsərrüfatı texnikasının təmiri və texniki xidməti üçün lazım olan bütün ehtiyat hissələrini də seçə biləcəklər.
İlk dəfə olaraq Azərbaycan bazarında Samara vilayətinin “Pegas-Agro” şirkətinin istehsalı olan “TUMAN-2” özügedən çiləyici-səpələyici qurğu təqdim olunacaq. Kənd təsərrüfatı texnikasının “TUMAN-2” xətti çox modulluluq, universallıq, sahəyə ehtiyatlı münasibət və nəticədə yüksək məhsuldarlıq və xərclərini tez bir zamanda (orta hesabla 1,5-2 mövsümə) çıxara bilmək kimi fərqləndirici xüsusiyyətlərə sahibdir.
Penza vilayətinin “Aqromexanika” şirkəti ekspozisiyanın qonaqlarına Azərbaycan fermerlərinin bütün aqroiqlim zonalarında və bütün növ torpaqlarda, o cümlədən küləş, ağır torpaqlar və zəif hazırlanmış kənd təsərrüfatı fonlarında istifadə edə biləcəkləri flaqman məhsullarını – “KPU-6m” qoşqulu universal kultivatoru və “BDM-3x2PK” yarımqoşqulu diskli dırmığı nümayiş etdirəcək.
Nijni Novqorodun “SC Melinvest” şirkəti yerli sahibkarlara taxılın təmizlənməsi, emalı və saxlanması üçün geniş çeşiddə avadanlıq təqdim edəcək.
Beləliklə, “Rusiya–Azərbaycan TarlaGünü – 2023” sərgisi Rusiya ilə Azərbaycan arasında kənd təsərrüfatı sahəsində qarşılıqlı faydalı əməkdaşlığın inkişafı üçün mühüm hadisədir.
“Xalq qəzeti”