Qeyri-neft-qaz sektorunun inkişafı sayəsində onun ÜDM-də payı Azərbaycanın ən yaxın tarixində maksimuma çatacaq. Bu fikri “Qazprombank”ın Bazarın Təhlili Departamentinin rəis müavini Gülnarə Xaydarşina bildirib.
O, aparılan hesablamalara əsaslanaraq Qarabağda yeni layihələr və Azərbaycanın Avrasiya regionunda artan logistik əhəmiyyəti sayəsində qeyri-neft-qaz sektorunun hazırkı inkişaf tempini saxlamaqla 2024-cü ilə qədər onun ÜDM-də payının 70 faizə yaxınlaşacağını diqqətə çatdırıb. Rəis müavini, eyni zamanda, bu göstəricinin Azərbaycanın ən yeni tarixindəki maksimum səviyyəyə uyğun olacağını vurğulayıb.
G.Xaydarşina qeyd edib ki, 2026-cı ilə qədər Qarabağda layihələrə təxminən 10 milyard ABŞ dolları (ÜDM-in 18 faizi) sərmayə qoyulması planlaşdırılır, xarici investorlar (o cümlədən Türkiyə, Birləşmiş Ərəb Əmirlikləri, İtaliya, Böyük Britaniya və Rusiya) fəal şəkildə cəlb olunur.
“Qazprombank”ın nümayəndəsi əlavə edib ki, infrastrukturun və sosial əhəmiyyətli obyektlərin modernləşdirilməsi ilə yanaşı, qeyri-neft-qaz məhsullarının istehsalına, habelə ixracına yönəlmiş yeni sənaye və iqtisadi zonalar yaradılacaq.
“Xalq qəzeti”
.jpg)