AFFA-nın inzibati binasında Azərbaycan milli komandasının baş məşqçisi Fernandu Santuşun mətbuat konfransı keçirilib.

UEFA Millətlər Liqasının qrup mər­hələsinin ilk iki turunda İsveç və Slovaki­ya yığmalarına qarşı keçiriləcək oyunların heyətini açıqlayan portuqaliyalı mütəxəs­sis media nümayəndələrinin suallarını ca­vablandırıb.

O, bəzi futbolçuların zədə səbəbindən millidən kənarda qaldıqlarını açıqlayıb: “50 nəfərə yaxın siyahı var idi, onların arasından seçim etdik. Şahrudin Məhəm­mədəliyev, Musa Qurbanlı, Mahir Emreli, Anton Krivotsyuk, Hacıağa Hacılı, İsmayıl İbrahimli kimi oyunçular zədəli olduqları üçün siyahıya salınmayıblar”.

Baş məşqçi gələcək üçün mübariz komanda formalaşdırmağa çalışacaqları­nı bildirib: “Bura gəlməyimizdə məqsəd rəqabətədavamlı komanda qurmaqdır ki, həmin kollektiv gələcəkdə ölkəni uğurla təmsil edə bilsin. İndiki məqamda köklü dəyişiklik etməyə ehtiyac yoxdur. Futbol­çularla ilk dəfə birgə işləyəcəyik. Cəmi bir məşq etmək imkanımız olacaq. Həm onlar bizi, həm də biz onları tanıyacağıq. Azər­baycan naminə bayraq, himn üçün əzmkar, mübarizə aparan kollektiv qurmaq istəyi­rik. Hamımız Azərbaycan naminə nəsə et­mək üçün buradayıq. Əsas Azərbaycanın adı, bayrağıdır. Hazırkı məqamda bu, əsas məqsəddir”.

Çalışdırıcı İsveç və Slovakiya yığma­larını təhlil etdiklərini söyləyib: “Rəqib­lərin bütün futbolçuları haqqında ətraflı məlumata malikik. Dünyada elə bir məşqçi yoxdur ki, qələbədən başqa nəticə istəsin. Biz də elə kollektiv qurmaq istəyirik ki, futbolçular inamlı və iddialı olsunlar. Öz dəst-xətti olan, çox qol vurub, az qol bu­raxan komanda yaratmağa çalışacağıq”.

Qeyd edək ki, Azərbaycan milli ko­mandası sentyabrın 5-də Bakıda İsveç yığ­ması, sentyabrın 8-də isə Koşitsedə Slova­kiya seçməsi ilə qarşılaşacaq.