Azərbaycan idmanı tarixinin ən əlamətdar günlərini yaşayır. Milli Olimpiya komandamızın Fransanın paytaxtında keçirilən yay Olimpiya oyunlarında ilk böyük qələbəsi ürəyi Azərbaycanla döyünən hər kəsə qürur dolu xoş anlar yaşatdı. 

Müstəqil Azərbaycan idmançılarının iştirak etdikləri səkkizinci olimpiadada 8-ci qızıl medalı dünya çempionu, 4 qat Avropa çempionatının qızıl medalçısı Hidayət Heydərov qazandı. Nəzərə al­saq ki, həlledici görüş məhz cüdo ölkələrindən biri olan, özü də hələ də bu idman növü üzrə qızıl medal qazana bilməyən Fransanın yerli idmançısına qarşı idi, o zaman vəziyyətin nə qədər gərgin olduğunu təsəvvür etmək olar. Yerli azarkeşlərin öz idman­çılarını qələbəyə səsləmələri tam təbii olsa da, Hidayət üçün əlavə təzyiq yaradırdı. Rəqib məkrli siyasəti ilə uzun illər Azərbaycana düşmən mövqe sərgiləyən bir ölkənin təmsilçisi olduğu üçün qar­şılaşma prinsipial xarakter daşıyırdı. Azərbaycana, onun idmançısına xas səbir, təmkin nümayiş etdir­məklə qarşılaşmanı nəzarətdə saxlayan, məqam ye­tişdikdə çox dəqiq, ölçülüb-biçilmiş hərəkəti ilə dö­yüşü qalib başa çatdıran Hidayət üstünlüyün məhz bizim tərəfimizdə olduğunu nümayiş etdirdi. Qələ­bənin gətirdiyi burulğan yerli publikanı bir an don­dursa da, saniyələr ərzində necə deyərlər, özlərinə gəlib reallıqla barışmalı oldular. Mükafatlandırma mərasimində iştirakçıların Dövlət Himnimizi ayaq üstə, alqışlarla dinləmələri qürurverici idi. 

Azərbaycan Cüdo Federasiyasının (ACF) vitse-prezidenti Elnur Məmmədli Hidayət Hey­dərovun (73 kiloqram) Paris Oyunlarında çem­pionluğunu yüksək dəyərləndirib. O qeyd edib ki, Hidayət Olimpiya çempionu olmaqla verdiyi bütün sözlərə əməl edib, qarşısına qoyulan tap­şırığı layiqincə yerinə yetirib. 

Federasiya rəsmisi bildirib ki, Hidayətin Pa­risdə fransız idmançını məğlub etməsi, Azərbay­can Bayrağını qaldırıb, Dövlət Himnini səslən­dirməsi ikiqat sevincə səbəb olub: 

–Xalqımızı təbrik edirəm. Hidayət ağıllı güləş nümayiş etdirdi. O, artıq Avropa, dünya və Olimpi­ya çempionudur. Gənclər və İdman Nazirliyi, Milli Olimpiya Komitəsi və Azərbaycan Cüdo Federasiya­sına da minnətdarlığımı bildirirəm. Rəqibin itirəcək heç nəyi yox idi. Amma Hidayət Avropa və dünya çempionu olmaqla yanaşı, öz çəkisi üzrə dünya rey­tinqində ilk sıradadır. Rəqib var gücü ilə güləşirdi. Fransızlar öz təmsilçilərini yaxşı dəstəkləyirdilər. Tribunada da ona dəstəyin çox olduğu görünürdü. Amma əsas qələbədir. Hidayət də bunu bacardı. 

Veteran cüdoçu bildirib ki, federasiyada idman­çılarımız üçün hər cür şərait yaradılıb. Hidayət bü­tün çətinliklərin öhdəsindən gəldi və özünü yaxşı tərəfdən göstərə bildi. Çox sevindirici haldır ki, onun üzərində mənim də əziyyətim var. 

Komandamız Paris Oyunlarında çıxışını davam etdirir. Dünən millimizin üzvləri bu mötəbər yarış­da mübarizəni davam etdiriblər. Cüdo komandamı­zın daha bir titullu idmançısı, builki dünya çem­pionatının qalibi Zelim Tçkayev (81 kq) tatamiyə çıxıb. 1/16 finalda fransalı Umar Alfa Djalo ilə üz-üzə gələn idmançımız, təəssüf ki, onun öhdəsindən gələ bilməyib. 

Azərbaycan üzgüçüsü Ramil Vəlizadə də yarış­da çıxışını başa vurub. 200 metr məsafəyə batterfl­yay üsulu ilə üzən idmançımız təsnifat mərhələsini adlaya bilməyib. Buna onun yekun nəticəsi səbəb olub. Məsafəni 1 dəqiqə 59,77 saniyəyə qət edən üzgüçümüz 27 iştirakçı arasında 25-ci olub, bir idmançı isə yarışa qatılmayıb. Yarımfinala 16 ən yaxşı idmançı yüksəldiyi üçün Ramil mübarizəni dayandırmalı olub. 

Akademik avarçəkmə üzrə Diana Dımçenko Oyunların 1/4 final mərhələsində mübarizə aparıb. O, 2000 metr məsafəyə fərdi yarışın qrup mərhələ­sində 6 idmançı arasında 4-cü yeri tutub. Təmsilçi­miz məsafəni 7 dəqiqə 53,76 saniyəyə qət edib. Bu nəticə ilə idmançı C/D yarımfinalına vəsiqə qaza­nıb. 1/4 final mərhələsində ilk üç yerin sahibi A/B, digər üç olimpiyaçı C/D yarımfinalına yüksəlib. D.Dımçenko 6-12-ci yerlər uğrunda mübarizəyə qoşulacaq. A/B yarımfinalları avqustun 1-də, C/D yarımfinalları isə iyulun 31-də baş tutacaq. 

Dünən, həmçinin boksçular - Nicat Hüseynov (51 kq) və Murad Allahverdiyev (80 kq) rinqə çıxıblar. Yarışa 1/16 finaldan başlayan N.Hüsey­nov Dominikandan olan Junior Alkantara Reyesə uduzub. M.Allahverdiyev misirli Abdelrahman Ab­delcavvadla qarşılaşıb. Boksçumuz rəqibinə qalib gələrək 1/4 finala yüksəlib. 

Azərbaycanın kamandan oxatanı Yaylagül Rama­zanova 1/32 finalda çinli An Qixuana qalib gəlsə də, idmançımız növbəti mərhələdə – 1/16 finalda almanı­yalı Mişel Kroppenə uduzaraq mübarizəni dayandırıb. 

Bu gün cüdo komandamızın daha bir perspek­tivli üzvü, 90 kiloqram çəki dərəcəsində Elcan Ha­cıyev gücünü sınayacaq. Builki Avropa çempionatı­nın qalibi, həmçinin Paris, Tbilisi “Böyük dəbilqə” turnirlərində gümüş, Qazaxıstandakı analoji yarışda isə bürünc medal qazanıb. Onun potensialı da ki­fayət qədər yüksək qiymətləndirilir. 

Cüdoçumuz Hidayət Heydərovun Parisdə qa­zandığı qızıl medal yarışda çıxışını davam etdirən idmançılarımız üçün böyük motivasiyadır. Ümid edirik ki, olimpiyaçılarımız Vətənə yüksək müka­fatlarla dönəcəklər.