Azərbaycan müstəqillik dövründən bəri ilk dəfə Yay Olimpiya Oyunlarında komanda yarışlarında təmsil olunacaq. Basketbolun 3X3 növü üzrə qadınlardan ibarət millimiz mötəbər yarışda iştirak edəcək. Dünyanın ən güclü 8 komandasının qatılacağı turnirdə komandamızdan hansı nəticəni gözləyirik? Bəs bu uğur basketbolumuza nə verəcək?
Azərbaycanda basketbolun inkişafı istiqamətində son 2 ildə görülən işlərə nəzər salsaq, bu idman növündə nailiyyətlərin əldə edilməsi gözlənilən idi. Olimpiya komandamız hələ ötən il Astara, Bakı və Şuşada keçirilən yarışlarda inamla çıxış edərək reytinq xallarını yığmağa nail olmuşdu. Yığmamızın Honkonqda keçirilən 1-ci təsnifat turnirində olimpiadaya yeganə vəsiqə uğrunda B qrupunda parlaq Çili və Monqolustanı məğlub etməsi ümidləri xeyli artırmışdı. Qrupun son oyununda Niderlanda uduzsa da, yarımfinala yüksələn xanımlarımız bu mərhələdə inamlı oyunları sayəsində Macarıstana, finalda isə Polşaya qalib gəlməsi Paris Olimpiadasında iştirak üçün “yaşıl ışıq” yandırdı.
Paris Olimpiadası ərəfəsində Azərbaycan idmanı tarixində komanda növləri arasında Olimpiya Oyunlarına ilk dəfə lisenziya əldə edən qadınların 3x3 basketbol millisi Paris Olimpiadası ərəfəsində Avropa Kubokunun final mərhələsinə vəsiqənin əldə edilməsi komandamızın güclü potensialının daha bir göstərdi.
Azərbaycanın qadınlardan ibarət 3x3 basketbol millisinin üzvü Dina Ulyanova açıqlamasında əldə edilən nəticənin Azərbaycan basketbolu üçün böyük əhəmiyyət daşıdığını bildirib:
– Qızlarımız yüksək səviyyədə basketbol oynadıqlarını bir daha sübut ediblər. Onlar Paris Yay Olimpiya Oyunlarında ölkəmizi layiqincə təmsil etmək üçün səylərini daha da artıracaqlar.
Qadınlardan ibarət 3x3 basketbol millisinin baş məşqçisi Ratomir Deliç də basketbolçuların qələbəyə kökləndiklərini deyib:
– Olimpiya Oyunlarında qələbə üçün meydana çıxacağıq. Komandamız 8 ən güclü yığmadan biridir. İmkanlarımızdan tam istifadə edib, oyunlarda mübarizə aparacağıq. Bütün idmançıların arzusudur ki, Olimpiya Oyunlarında iştirak edib, yaxşı nəticə qazansınlar. Məğlubedilməz komanda isə yoxdur.
Azərbaycan Basketbol Federasiyasının mətbuat katibi Sənan Əliyev qəzetimizə açıqlamasında basketbolçuların Serbiyanın Novi-Sad şəhərində hazırlıqlarını davam etdirdiklərini bildirdi:
– Novi-Sad dünyada 3X3 basketbolu üzrə mərkəz hesab olunur. Komandanın serbiyalı baş məşqçisi Ratomir Deliç və digər mütəxəssislər qızlarımıza gündə 2 dəfə olaraq intensiv məşqlər keçirlər. Millimizin heyətində mübarizə aparacaq Mersedes Volker, Aleksandra Mollenhauer, Dina Ulyanova və Tiffani Heys yaxşı formadadırlar. Hazırlıq iyulun sonunadək davam edəcək. Həm kişilərdə, həm də qadınlarda favorit ABŞ komandasıdır. İlk dəfə iştirak etdiyimiz komanda yarışında medal qazansaq, sevinərik. Amma bu ilkdir, qızlarımıza böyük bir təcrübə olacaq.
“Paris-2024”də qadın basketbolçuların yarışı iyulun 30-da başlayacaq, avqustun 5-dək davam edəcək. Komandamız startda İspaniya yığması ilə qarşılaşacaq.
Rəqabət olimpiadada çox güclüdür. Amma buna baxmayaraq, qızlarımız da sonacan mübarizə aparmaq əzmində olduqlarını ötən yarışlarda nümayiş etdiriblər. Digər tərəfdən basketbolçularımızın olimpiadada mübarizəsi ilə Azərbaycanın qadın basketbolunda yeni bir dövr başlayır. Heç şübhə yoxdur ki, bu, ölkəmizdə basketbolun kütləviləşməsinə, daha da inkişafına güclü təkan verəcək.
Olimpiadaların çox populyar və sevilən basketbol yarışlarını azarkeşlərimiz ilk dəfə sonsuz maraq və böyük həyəcanla izləyəcəklər. Ümid edirik ki, komandamız Azərbaycanı layiqincə təmsil edib, bayrağımızı yüksəklərdə dalğalandıracaq!
Leyla QURBANOVA
XQ
