İşğaldan azad edilmiş ərazilərimizdə mühüm əhəmiyyətli beynəlxalq idman yarışlarının uğurla təşkili davam edir. Mayın 1-də Suqovuşanda Ümummilli lider Heydər Əliyevin anadan olmasının 101-ci ildönümünə həsr edilən avarçəkmə üzrə “Prezident Kuboku-2024” başlayıb. 

Yarışın açılış mərasimində Gənclər və İdman Nazirliyinin (GİN) İdman şö­bəsinin müdiri Elnur Məmmədov əvvəlki illərdən fərqli olaraq, budəfəki yarışda daha çox ölkənin idmançılarının iştirak etdiklərini bildirib. Milli Olimpiya Komitə­sinin vitse-prezidenti Çingiz Hüseynza­də reqatanın beynəlxalq səviyyəli yarış olduğunu xatırladaraq onun davamlı ol­masını arzulayıb. 

Sonra yarışa start verilib. Turnirdə 20-dən çox ölkədən – Azərbaycanla yanaşı, Bolqarıstan, Xorvatiya, Estoni­ya, Gürcüstan, Almaniya, Yunanıstan, Macarıstan, Qazaxıstan, Qırğızıstan, Latviya, Litva, Moldova, Polşa, Serbiya, Sloveniya, İspaniya, Tacikistan, Türkiyə, Ukrayna və Özbəkistandan olan ko­mandalar mübarizə aparacaq. Yarış bu gün və sabah Mingəçevir Kür Olimpiya Tədris-İdman Mərkəzində davam edə­cək. Mayın 3-də Mingəçevirdə yarışın bağlanış mərasimi keçiriləcək. 

Azərbaycan Kanoe və Avarçəkmə Federasiyanın (AKAF) baş katibi Fər­had Əliyev jurnalistlərə açıqlamasında “Prezident Kuboku-2024” turniri barədə danışarkən işğaldan azad olunmuş əra­zilərimizdə bu cür yarışların təşkilinin tarixi hadisə olduğunu bildirib. O qeyd edib ki, 3-cü dəfə təşkil olunan yarışda daha çox ölkədən idmançılar iştirak edir. Baş katib deyib ki, ilk turnirdə 5, sonra­kında 17 ölkə təmsil olunurdusa, hazır­da bu yarışa 21 dövlətdən idmançılar qatılıblar: 

– Yarışda təmsil olunan ölkələrin sa­yının artması bizi sevindirən məqamdır. Yarışdan əvvəl “Prezident Kuboku”na qatılacaq idmançılar arasında turnir təş­kil olunur və orada fərqlənənləri bura cəlb edirik.

Onun sözlərinə görə, bu yarışın Füzuli şəhərində də təşkili planlaşdı­rılır. Qeyd edilib ki, su hövzəsini yox­lamaq üçün həmin əraziyə beynəlxalq mütəxəssis cəlb ediləcək. 

AKAF rəsmisi Neftçala şəhərində də yarış təşkil edildiyini və təşkilatçılıq baxımından hər şeyin qaydasında oldu­ğunu bildirib. Vurğulayıb ki, hazırda su hövzəsinin bəzi yerləri standartlara ca­vab vermədiyi üçün indiki halda orada yarış keçirmək alınmır. 

F.Əliyev Azərbaycan avarçəkəni Di­ana Dımçenkonun Paris Yay Olimpiya Oyunlarına lisenziya qazanmasını bö­yük uğur adlandırıb. O qeyd edib ki, id­mançımızın iştirak etdiyi turnirdə küləkli hava şəraiti idmançılara təsir etsə də, Diana sınaqdan üzüağ çıxıb. 

Xatırladaq ki, Gənclər və İdman Na­zirliyi ilə Azərbaycan Kanoe və Avarçək­mə Federasiyasının birgə təşkilatçılığı ilə keçirilən “Prezident Kuboku” avar­çəkmə yarışı ardıcıl ikinci ildir Avropa Kanoe Assosiasiyasının (ECA) rəsmi təqvim planına daxil edilib.

L.QURBANOVA
XQ