Nicat Abasov şahmat tacı iddiaçılarının turnirinə ağlarla başlayır
Ötən ilin yayında Bakıda keçirilmiş Dünya kuboku turnirinin yarımfinalçısı, azərbaycanlı qrossmeyster Nicat Abasov, hindistanlı keçmiş dünya çempionu Vişvanatan Anandın davamçıları Santoş Vidit, Dommaracu Qukeş, Rameşbabu Praqnanandha, ABŞ şahmatçıları Fabiano Karuana, Hikaru Nakamura, Əlirza Firuzca (Fransa) və rusiyalı Yan Nepomnyaşi. Dünya şahmatının bu səkkiz parlaq zəka sahibi Kanadanın Toronto şəhərində iddiaçılar turnirinin startı ərəfəsindədir.
Əhəmiyyətinə görə, bəlkə də, siyasətçilərin mötəbər sammitlərindən geri qalmayan yarışın qalibi özünü çox xoşbəxt hiss edəcək. Turnirin ən yaxşı iştirakçısı dünya şahmat tacı uğrunda matçda hazırkı çempion, Çin Xalq Respublikası təmsilçisi Dinq Lirenə rəqib olacaq. Bu isə hər bir qrossmeysterin ürəyindən keçən böyük arzudur.
Təsadüfi deyil ki, planetin hər yerində milyonlarla qədim və müdrik oyun pərəstişkarının diqqəti hazırda Kanadaya yönəlib. Bu gün Torontoda starta çıxıb, üç həftədən sonra finişə çatacaq iddiaçılar turnirinin bütün görüşləri şahmat aləmində hədsiz maraqla gözlənilir. Heç kim dünya tacı uğrunda mübarizədə 17-ci dünya çempionu ilə kimin qarşılaşacağı məsələsinə biganə deyil.
Azərbaycanın şahmat ictimaiyyəti üçün ikiqat fərəhli haldır ki, iddiaçılar səkkizliyində həmvətənimiz Nicat Abasov da var. O, ötən illərdə belə məsul yarışların iştirakçıları olmuş Teymur Rəcəbov və Şəhriyar Məmmədyarovdan sonra iddiaçılar turnirində oynamaq hüququ qazanmış üçüncü şahmatçımızdır.
Səkkiz-doqquz ay əvvəl N. Abasov paytaxtımızda Dünya kuboku yarışında gözlənildiyindən də yaxşı çıxış etmiş, ardıcıl altı rəqibini turnirlə vidalaşmağa məcbur edib, yarımfinala çıxmışdı. Nicat yalnız dəfələrlə dünya çempionu norveçli dahi Maqnus Karlsenə, sonra da üçüncü yer uğrunda matçda Karuanaya məğlub olub, yarışı fəxri dördüncü yerdə başa vurmuşdu. Bu, Azərbaycan şahmat məktəbinə qürur gətirən nailiyyət idi.
Həmyerlimizin qalib gəldiyi rəqiblər arasında Loran Fressine (Fransa), Pyotr Svidler (FİDE–Rusiya), Aniş Giri (Hollandiya), Torontoda yenə üz-üzə gələcəyi Santoş Vidit kimi məşhur qrossmeysterlər var idi.
Şahmat həvəskarlarının, o cümlədən, “Xalq qəzeti” oxucularının turnirə marağını nəzərə alaraq, birinci dövrədə N. Abasovun görüşlərinin təqvimini diqqətə çatdırırıq. Şahmatçımız bu günə təyin edilmiş 1-ci turda ağ fiqurlarla Nepomnyaşiyə qarşı oynayacaq. Aprelin 5-də və 6-da ikinci-üçüncü raundlarda Abasovun rəqibləri Karuana və Nakamura olacaq. Dördüncü turda (7 aprel) Abasov—Firuzca görüşünü izləyəcəyik. Aprelin 8-də rəqiblər təşkilatçıların onlar üçün nəzərdə tutduqları istirahət günündə bir qədər dincəlmək imkanı qazanacaqlar. Sonrakı üç gündə isə (9-11 aprel) Hindistan üçlüyü—müvafiq surətdə Qukeş, Praqnanandha və Viditlə oyunlarımız olacaq.
Mayın 14-də 29 yaşı tamam olacaq N. Abasov Bakıda Dünya kuboku yarışında böyük nailiyyət qazanıb, bütün turnir günlərində çıxışlarını həyəcanla izləyən idman həvəskarlarımızı ürəkdən sevindirmişdi. Əvvəllər o, dünya şahmatının ən mahir ustalarını öz bayrağı altına toplayan belə yarışlarda heç vaxt bu qədər uzağa gedə bilməmişdi. Paytaxtımızda isə hamını təəccübləndirib, yarımfinala qədər irəliləyə bildi. Bu uğura görə mükafatı bütün zəka sahiblərinin arzuladığı, amma heç də hamının üzünə gülməyən iddiaçılar turnirinə vəsiqə oldu.
Nicat Abasov doğma Bakıdakı kimi, uzaq Torontoda da mümkün qədər yaxşı nəticə göstərib, Dünya kuboku yarışında qazandığı uğurun təsadüfi olmadığını iddiaçılar turnirində sübuta yetirməyə çalışacaq. Qrossmeysterimizə dəqiq gedişlər arzulayırıq.
Oqtay BAYRAMOV,
Əməkdar jurnalist
