Bu gün daha böyük sınaq günüdür. Bakı, bütün Azərbaycan, “Qarabağ”ı öz komandası bilən qardaş Türkiyə UEFA Avropa Liqası turnirində tarix yazmaqda davam edən səmimi və mübariz Ağdam kollektivinin Almaniyanın Leverkuzen şəhərinin “Bayer” klubu ilə səkkizdəbir final görüşünü səbirsizliklə gözləyir. Həm də qürurla, ümidlə. Hərçənd rəqib Avroliqa yolunda qarşımıza çıxan ən zəhmli klubdur. Bundesliqa, Almaniya kuboku və beynəlxalq meydanda ardıcıl 34 oyunda bir dəfə də uduzmayan “Bayer” və onun ispan baş məşqçisi Xabi Alonso dünyanın diqqət mərkəzindədir.
Elə pley-offda Portuqaliyanın “Braqa”sını iki oyunun yekununda (6:5) silahı yerə qoymağa məcbur edən Azərbaycan çempionunun və onun baş məşqçisi Qurban Qurbanovun da ünvanına bu günlərdə az tərif eşitmirik. Beynəlxalq dairələrin rəğbətini qazanmaq isə ikiqat fərəhlidir. “Qarabağ” oynadığı yaxşı futbolla, güclü rəqiblər üzərində qazandığı layiqli qələbələrlə özü ilə yanaşı, təmsil etdiyi Azərbaycanı da, onun həqiqətlərini də Avropaya və dünyaya daha yaxından tanıdır.
Braqalılarla Bakı matçından sonra Portuqaliya mətbuatının 120+2-ci dəqiqədə qonaqların qapısına yol tapıb, onların bütün ümidlərini alt-üst edən Nəriman Axundzadəni “gənc istedad”, meydanda yorulmaq bilmədən böyük faydalı iş həcmini yerinə yetirən Marko Yankoviçi “maestro” adlandırması, digər Marko-Veşoviçi isə özünü hər yerə çatdıran “inadkar” oyunçu hesab etməsi təsadüfi deyil. Onlarla yanaşı, oyun ərzində dəfələrlə yüksək sürətlə 35-40 metr məsafə qət edib, rəqib qapısı ağzında gərgin vəziyyətlər yaradan Elvin Cəfərquliyev, İspaniyanın “Betis”, Yunanıstanın PAOK, Xorvatiyanın “Hayduk” klublarının maraq dairəsinə düşən Bəhlul Mustafazadə və “Braqa” ilə Bakıdakı oyunun qəhrəmanlarından biri Bədavi Hüseynovun, bütün komandanın bu gün Ağdam şəhəri təmsilçisinin Çempionlar Liqasından sonra qitənin ən nüfuzlu ikinci klub turnirinin səkkizdəbir finalçısı olmasında xidmətləri böyükdür.
Baş məşqçimiz Q.Qurbanovun “Braqa” ilə görüşün ən ağır dəqiqələrində Mateus Silva ilə N.Axundzadəni meydana çıxardığını da hələ çox xatırlayacağıq. Portuqaliyada ilk oyunda Silva qapımıza penalti təyin edilməsinə səbəb olmuşdu, Nəriman isə hesabı 5:2-yə çatdırmaq imkanını itirmişdi. Cavab görüşündə gərginliyin son həddə çatdığı anlarda Qurban müəllimin hər iki futbolçunu döyüşə göndərməsi, başqa sözlərlə desək, od-alov içinə atması özünü tam doğrultdu. “Qarabağ”ın hər iki topunu məhz bu futbolçuların vurması məşqçinin böyük uğuru, yüz ölçüb, bir biçdiyi həlledici qərarın bəhrəsi idi.
Görüşün yarısından da çox hissəsini on nəfərlə oynamağa məcbur qalan komandanın döyüşkən ruhu, üstəgəl, onun sadiq pərəstişkarlarının gecəyarısı soyuq havada möhkəm dəstəyinin nəticəsidir ki, Avropa mətbuatı “Qarabağ”ın qitəmizi təəccübləndirməkdə davam etdiyini yazır, xarici ölkələrdə bəzi klubların futbolçularının birlikdə “Qarabağ”—“Braqa” qarşılaşmasını izlədiklərini eşidirik.
Göründüyü kimi, “Qarabağ” getdikcə böyüyür. Böyüdükcə də beynəlxalq futbolda ona hörmət və rəğbət də artır, UEFA rəsmiləri bizə daha isti münasibət göstərir, “Qarabağ”ın heç bir rəqibdən çəkinmədiyini, istənilən vəziyyətdə adət etdiyi hücum futbolu oynamağa üstünlük verdiyini görürük. Bu isə o deməkdir ki, Azərbaycan çempionu düzgün yoldadır, əzmkarlığı, zəhməti nəticəsiz qalmır.
Ağdam komandasının bu gün Avroliqanın ən güclü 16 klubu sırasında addımlaması “Qarabağ”ın da, eyni bir kollektivin “sükanı arxasında” uzunmüddətli və səmərəli fəaliyyəti nümunə göstərilən Q.Qurbanovun da dünya və Avropa reytinq siyahılarında durmadan mövqelərini yaxşılaşdırır, onları bir çox məşhur klub və məşqçilərdən irəli çıxarır. UEFA Avropa Liqası turnirində dörddəbir finalın astanasında olan komandamız artıq çox böyük iş görmüşdür. Zarafat deyil, “Qarabağ” indiki yarışda səkkizdəbir final sevinci yaşayan keçmiş Sovet İttifaqının yeganə təmsilçisidir.
Müzəffər “Qarabağ”—məğlub-edilməz “Bayer” görüşündə hakimin saat 21:45-də səslənəcək start işarəsinə az qalır. Azərbaycan çempionu çox sağ olsun ki, “Bayer” kimi bir klubu son 4-5 ayda ikinci dəfə Bakıya gətirib. Bu rəqiblərin sadə və təvazökar məşqçilərinin Leverkuzendə görüşüb, təcrübə mübadiləsi aparmaları da qarşıdakı görüşə xüsusi məna verir. İzləməyə hazırlaşdığımız oyun həm də Qurbanov—Alonso rəqabətidir. Görək, təcrübə mübadiləsindən kim daha çox fayda götürüb.
“Qarabağ” oktyabrda qrup mərhələsi çərçivəsində səfərdə “Bayer”ə böyük hesabla uduzmuşdu (1:5), noyabrda öz meydanında yalnız son dəqiqələrdə penalti ilə buraxdığı qolla məğlub oldu (0:1). İndi isə erkən bahardayıq, 90 dəqiqə ərzində meydanda baş verəcək hadisələrdən və qeydə alınacaq nəticədən asılı olmayaraq, bütün hallarda böyük futboldan zövq alacağıq. Bu imkanı bizə yaradan isə, bir daha təkrar edək, son nəfəsədək döyüşməyi bacaran “Qarabağ” komandasıdır!
Oqtay BAYRAMOV,
Əməkdar jurnalist