Kişi və qadın komandalarımız bununla ən yaxşı nəticə qazanıb
Rumıniyanın paytaxtı Buxarestdə keçirilən Avropa çempionatında yunan-Roma güləşi üzrə komandamız tarixi nəticə əldə edib. İlk dəfə qitə birinciliyində 3 qızıl medal qazanan “klassiklər”imiz medalların əyarına görə, Avropa çempionatlarında ən yaxşı nəticəsinə imza atıb.
Baş məşqçi Aleksandr Tarakanov, böyük məşqçi Rövşən Bayramov, məşqçilər Həsən Əliyev, Kamran Məmmədov və Elvin Mürsəliyevin rəhbərliyi altında komandamız ümumilikdə 6 medal qazanıb.
Nihat Məmmədli (60 kq) finalda moldovalı Viktor Çebanunu 8:3, Murad Məmmədov (63 kq) isə həlledici görüşdə ukraynalı Aleksandr Qruşini 2:1 hesabı ilə məğlub edərək ilk dəfə Avropa çempionu adına layiq görülüblər. Ötənilki qitə çempionatının qalibi Həsrət Cəfərov (67 kq) titulunu qorumağı bacarıb. O, həlledici görüşdə rusiyalı Ruslan Biçurindən üstün olub – 8:5.
Komandamızın digər üzvləri Rəşad Məmmədovla (55 kq) Ülvi Qənizadə (72 kq) gümüş, Beka Kandelaki (130 kq) isə bürünc medal əldə ediblər.
Artıq ikinci dəfə Avropa çempionu tituluna yiyələnən Həsrət Cəfərov bu uğurların arxasında böyük əziyyət durduğunu deyib. O qeyd edib ki, turnirdən öncə Xorvatiyada yüksək səviyyəli təlim-məşq toplanışında iştirak edib:
–Əziyyət çəkdik və bəhrəsini gördük. Qarşılaşdığım idmançıların titullu olması görüşlərin çətin keçməsinə səbəb oldu. Mən heç bir görüşə özümdən razı şəkildə çıxmıram. Çünki bunu bir idmançı kimi özümə yaraşdırmıram. Heç bir rəqibimi özümdən zəif hesab etmirəm.
H.Cəfərov Paris Yay Olimpiya Oyunlarına qədər daha bir yarışda mübarizə aparacağını bildirib. Dünya çempionatının finalında bəzi səhvlərə yol verdiyini qeyd edən güləşçi həmin səhvlərin üzərində işlədiyini vurğulayıb.
Medalların əyarına görə Avropa arenasında 1-ci yeri tutan yığmamız xallarla hesablama sisteminə görə, 142 xalla ardıcıl 2-ci dəfə yekun sıralamada ikinci pillədə qərarlaşıb. Millimiz çempion olan Türkiyədən cəmi 5 xal geri qalıb.
* * *
Rumıniyanın paytaxtı Buxarestdə keçirilən Avropa çempionatında 2 qadın güləşçimiz qızıl medal qazanıb.
9 qat Avropa çempionu Mariya Stadnik (50 kq) 10-cu titul üçün xalçaya çıxıb. O, həlledici görüşdə türkiyəli Evin Demirhanla qarşılaşıb və 10:0 hesabı ilə qələbə qazanıb. Stadnik bununla da 10-cu dəfə qitənin ən güclüsü adını qazanıb.
Avropa çempionatlarının üçqat bürünc mükafatçısı Alyona Kolesnik (59 kq) ilk finalını uğurla başa vurub. O, ukraynalı Alina Filipoviçlə güləşib. Görüş 3:3 hesabı ilə başa çatsa da, Kolesnik son xalı qazandığına görə ilk dəfə Avropa çempionu olub.
Leyla QURBANOVA
XQ
